Бу фестивалга билиҥҥэттэн бэлэмнэнэн саҕалыахха наада, дии саныыллар Эти-хааны эрчийии уонна спорт үнүстүүтүгэр. Архангельскайга биһиги үнүбэрсиэппит спортсмен – устудьуоннара тоҕо кыайыылаахтар пьедесталларыгар тахсыбатахтарын уонна алҕаһы көннөрүү үлэтин ыытар туһунан ЭХЭуоСҮ дассыана Ариан Тарасов кэпсиир.

“Фестивалга ХИБҮ сүүмэрдэммит хамаандата спорт бары көрүҥнэригэр кыттыыны ылбыта, ол курдук мини – футболга, харбааһыҥҥа, флорболга, остуол тенниһигэр. Биһиги хамаандабыт харбааһыҥҥа ситиһиилээхтик кыттыбыта, Эти-хааны эрчийии уонна спорт үнүстүүтүн устудьуоннара Анна Панина уонна Сергей Журавлев иккис бириистээх миэстэҕэ тиксибиттэрэ. Кыттааччылар олус үрдүк таһымнаах этилэр, Арассыыйа спордун маастардара уонна спорт маастарыгар хандьыдааттар күрэхтэспиттэрэ”, - диэн сырдатта дассыан.

Мини – футбол хамаандата маҥнайгы уонна иккис куурус устудьуоннарыттан турар. “Ситэри кыахпытын көрдөрбөтүбүт, ол гынан баран биһиги хамаандабытыгар сүрдээх кэскиллээх оҕолор бааллар. Хамаанда оонньуутун быраактыкатын таһымын үрдэтиэҕэ диэн эрэнэбит. Маны тэҥэ спорт саҥа көрүҥүн – флорболу (саалаҕа хоккейдааһыны) сайыннарыахпыт”, - диир Ариан Тарасов.

Фестивал чэрчитинэн, үөрэх кыһатын салайааччылара кыттыылаах төгүрүк остуол ыытылынна. ЭХЭуоСҮ дириэктэрэ Дмитрий Платонов Арассыыйаҕа спорт саҥа көрүҥүн – мас тардыһыытын билиһиннэрдэ. Түмүккэ спорт бу көрүҥүн фестивал саҥа бырагыраамматыгар киллэрии туһунан быһаарыы ылыннылар.

“Бэдэрээссийэлии үнүбэрсиэттэр спортсменнара үрдүк маастарыстыбалаахтарын көрдөрдүлэр. Маннык күүстээх утарылаһааччылары кытары күөн көрсөн, биһиги спортсменнарбыт техникаларын уонна тактикаларын үрдэтиэхтэрин сөп. Тэрийээччилэр Дьокуускайга Аммуоһап аатынан үнүбэрсиэт баазатыгар Бэдэрээссийэлии үнүбэрсиэттэр устудьуоннарын спортун бэһис фестивалын ыытыы туһунан анал бэлиэни туттардылар. Онон биһиги сүүмэрдэммит хамаандабыт билиҥҥэттэн бэлэмнэнэн саҕалыан наада”, - диэн түмүктээтэ дассыан Ариан Тарасов.