Оттон сыл аннараа өттүгэр манна саҥа культурнай-спортивнай комплекс тутулунна: икки этээстээх, кэрэ тутуу спортивнай, фитнес уонна киинэ саалалардаах. Типовой былаан быһыытынан, бу дьиэ культурнай-спортивнай комплекс быһыытынан тутуллубута, ол эрээри бөһүөлэккэ сынньалаҥ киинэ суоҕунан, сыл устата киинэни көрдөрүүнү уонна спортивнай күрэхтэһиилэри ыытыыны сэргэ культурна-сынньатар тэрээһиннэр ыытыллыбыттара.

Быйыл оройуон муниципалитета «Айхал» КСК өрөмүөнүгэр биэс мөлүйүөн солкуобайы биэрбитэ. Тас капитальнай өрөмүөҥҥэ тендеры «Бурцев» ИП сүүйбүтэ. Бүгүҥҥү күҥҥэ дьиэ илин өттө өрөмүөннэннэ. Дьиэ иһин ититэр систиэмэтин олоччу уларыттылар, пластиковай түннүктэри, киирэр тимир ааннары олортулар. Манна «Слепцов» ИП үлэлиир.

«Айхал» КСК директора Татьяна Соросова иһитиннэрбитинэн, сэтинньи 25 күнүгэр диэри өрөмүөн толору түмүктэниэ. «Айхал» Киин аанын эмиэ тэлэччи арыйыа, Тиксии олохтоохторо Саҥа Дьылы төрөөбүт кулууптарын сылаас-сырдык саалатыгар көрсүөхтэрэ. Улуус киинигэр икки «Айхал» КСК баар буолан, олохтоохтор 2014 сылга – Россия культуратын сылыгар – культура үлэһиттэрэ булуннары саҥа булумньуларынан, айымньыларынан уонна дьоҕурдарынан үөрдүөхтэрэ диэн эрэнэллэр.