Предприниматель Александр Егоров Хоточчуга сылын аайы 13 га сиргэ хортуоппуй, хаппыыста үүннэрэр. 2010 сыллаахха 70 тонна оҕуруот аһын уурар эбийиэги туппута. Кэлиҥҥи үс сылга улуус киинигэр маннык эбийиэги тутар баҕалаах этэ. Онто быйыл туолан, үөрүүтэ муҥура суох улахан. «Покровскайга 100 тонна оҕуруот аһын харайар, уурар тутууга 1 мөл.солк. кэриэтэ үбү-харчыны ороскуоттаатым. Олохтоох дьаһалта 18 куб базальт билиитэтин биэрэн көмөлөстө.

Хоточчуга үүннэрбит хортуоппуйбун Покровскайга киллэрэн киилэтин 30 солк., хаппыыстан киилэтин 18 солк. маҕаһыыннарга туттардым. Дохуотум икки бүк улаатта. Үс сыл иһигэр эбийиэк ороскуотун тилэри сабыаҕа диэн ааҕабын», - диир Александр Егоров.

Фермер үүннэрбит аһын батарыыны тилэри толкуйдаабыт. Ол курдук, чааһынайдарга атыылыыр, маҕаһыыннарга туттарар, тэрилтэлэри хааччыйар. Покровскайдааҕы оҕо сада оҕуруот аһын киниттэн эрэ ылар.

«Аһы харайар сирим температуратын кыраҕытык кэтиибин. Онон, оҕуруот аһа сылы эргиччи хаачыстыбата мөлтөөбөт», - диир кини.

Маннык эбийиэктэри Ядреевтар уонна «Дабаан» бааһынай хаһаайыстыба туттубуттара.