Сонно тута сүөһүнү уоран өлөрүүгэ холуобунай дьыала тэриллибитэ. Балаҕан ыйыгар, алтынньыга биир бөлөх Дьэр нэһилиэгэр хас да сүөһүнү өлөрбүтэ биллибит. Эттэрин Дьокуускай куоракка киллэрэн батарбыттар. Сидьиҥ быһыылаах дьон ураа муостааҕы доруоп саанан ытан, сороҕун миэстэтигэр сүгэнэн сүүскэ охсон өлөрөллөр эбит.

Силиэстийэ быһаарбытынан, түүлээх уллуҥахтар түүнүн биитэр киэһэ хараҥарыыта сүөһүлэри өлөртөөн, сонно тута миэстэтигэр тириитин сүлэн, иһин-үөһүн ороон, эттээн биллиргэтэ охсоот, тимир көлөлөрүгэр тиэйэн Дьокуускай илдьэллэр эбит.

Киин куоракка ырыынактааҕар (орто сыана 350-400 солк.) чэпчэки сыанаҕа, быһа холоон киилэтин 200 мөһөөх солкуобайга атыылаабыттар. Үксүн билэр дьоннорун нөҥүө батарбыттар. Бу туһунан РФ Саха сиригэр Ис дьыалаҕа министиэристибэтин силиэстийэлиир үлэһиттэрэ “Саха сиригэр” иһитиннэрдилэр.

Сүтүктээх дьон

Силиэстийэ быһаарбытынан, өссө биир бөлөх II Малдьаҕар (Покровскайтан салгыы 40-ча км) нэһилиэгэр “үлэлээбит”.

Бу икки бөлөх уопсайа уонтан тахса сүөһүнү уоран атыылаабыттар. Улуус дьаһалтатын тыа хаһаайыстыбатыгар департаменын үлэһиттэрэ эппиттэринэн, полицияҕа сүөһү сүппүтүн туһунан 12 сайабылыанньа киирбит. Силиэстийэ үлэһиттэрэуоруйахтар сыыһа-халты туттууларын туһанан харыларыттан харбаатылар. Буруйу оҥоруу бары эпизодтарын тиһэҕэр тиийэ арыйдылар. Уоруйахтар сүөһү астаабыт сирдэригэр малларын-салларын умнан, суолларын-иистэрин хаалларан бэрт кэбэҕэстик тутуллубуттар.

Хоромньу кээмэйэ

Олохтоохтор оҥоһуллубут ночооту ааҕан-суоттаан көрдүлэр. Ураа муостаахтарын кинилэр 50000-118000 солкуобайга тиийэ сыаналаатылар. Ол түмүгэр хоромньу уопсай суумата 1 мөл. солк. куоһарда. Буруй төһө да күһүн оҥоһуллуннар, полиция бу туһунан маассабай информация үлэһиттэригэр саҥа иһитиннэрдэ.

Эдэр уолаттар

Санаттахха, тутуллубут дьон бары эдэрдэр, 1986 сылтан бэттэх төрүөх уолаттар. Сорохторо хаста да сууттана сылдьыбыт дьон. Үлэ-хамнас, үөрэх, дьиэ кэргэн диэҥҥэ таласпатах, түргэнник байыыны олохторун сыала оҥостубут уолаттар. Билигин кинилэр СИЗО-ҕа сыталлар.

Дьон санаата

 Анатолий Кузьмин, Дьэр нэһилиэгин олохтооҕо:

Уоруйахтар сүөһүнү астыы үөрүйэх, түргэн туттунуулаах-хаптаныылаах эбиттэр. Киһи кыһыйыах,Покровскайдыыр суолтан баара-суоҕа 250 миэтэрэ тэйээт, эргэ остуолба баҕанатыгараҕалан баайан өлөрбүттэр. Кубаалданан сүүһүн олох тобулу охсон кэбиспиттэр. Түүн үөһэ хараҥаҕа, эбэтэр халлаан сырдаан эрдэҕинэ дуу, дьарыктаммыттар.Уоруйахтар ынахпын өлөрөн баран тириитин сүлэн, иһин-үөһүн, быарын барытын ороон бырахпыттар этэ. Сүөһүнү этин эрэ иһин сонордоспут дьон эбит.

 Иван Котельников, ИДьМ Хаҥалас улууһунааҕы полиция салаатын холуобунай ирдэбилгэ салайааччытын э.т.:

Икки түбэлтэҕэ уоруйахтар тоҕустуу сүөһүнү, холбоон 20-чэ сүөһүнү сидьиҥ быһыылаахтык өлөрөн атыылаабыттар. Кинилэр сүрүн сыаллара -- харчы. Туох да үлэтэ-хамнаһа суох дьон. Сорохторо урут хаста да сууттана сылдьыбыттар. Эти Дьокуускайга киллэрэрэн базаҕа туттарар киһилээхтэр эбит.