Уус-Алдаҥҥа Танда уонна Ханчы үрэхтэри туоратар икки тимир муоста тутулунна

Кулун тутар 7 күнүгэрТүүлээх – Бээрийэ икки ардынааҕы суолга Танда уонна Ханчы үрэхтэри туоратар өр күүтүүлээх икки тимир муостаны үлэҕэ киллэрии үөрүүлээх түгэнэ буолла.


Тэрээһиҥҥэ улуус баһылыга А.В. Федотов, Түүлээх нэһилиэгин баһылыга С.В. Винокуров, СР суол хаһаайыстыбатыгар уонна транспорка министрэ С.В. Винокуров, Ил Түмэн депутата Ю.П. Михайлов, Ил Түмэн председателин сүбэһитэ П.С. Васильев, «Уус-Алдан суоллара» ААО директора Г.Н. Сивцев, Түүлээх нэһилиэгин бочуоттаах олохооҕо И.С. Заровняев ,ыаллыы сытар Тиит Арыы, Байаҕантай, Бээрийэ нэһилиэктэрин баһылыктара, суол тутааччылара о.д.а. кыттыыны ыллылар.
Бу иннинэ Түүлээх олохтоохторо эрэйдэнэн, сороҕор өрүһүнэн эргийэн, сороҕор сатыы Тандаҕа диэри хааман улуус киинигэр тиийэллэрэ. Уруккү өттүгэр хас да төгүл муосталары тутан, халаан уутугар былдьаталлара, сороҕор төттөру соһон аҕалан урукку миэстэтигэр туруораллара. Түүлээх нэһилиэгин олохтоохторо суол суоҕуттан улахан моһуокка ылларалларын улуус салалтата өйдөөн, тимир муосталары «Уус-Алдан суоллара» ААО-ҕа сакаастаан туттарда. «Уус-Алдан суоллара» ААО үлэһиттэрэ бытархан тымныыттан, тыалтан, ардахтан куттаммакка, хара көлөһүннэрин тоҕон, тохтообокко үлэлээбиттэрин олохтоохтор бэлиэтээн, махтал тылларын тиэртилэр.
Бу күн Танда үрэҕэр тимир муоста аһыллыытыгар сахалыы сиэри-туому тутуһан улуус баһылыга А.В. Федотов, СР суол хаһаайыстыбатыгар уонна траснпортка министр С.В.Винокуров, нэһилиэк бочуоттаах олохтооҕо И.С. Заровняев аалай лиэнтэни кырыйдылар. Тэрээһин кыттыылаахтара бу саҥа муосталарынан бастаан сатыы хааман, онтон массыыналарынан туораатылар.
Салгыы аҕыйах километры айаннаан Ханчы үрэҕи туоруур эмиэ тимир, ол гынан баран арыый кылгас муостаҕа тиийдибит. Манна аалай лиэнтэни Ил Түмэн депутата Ю.П. Михайлов, Түүлээх нэһилиэгин баһылыга С.В. Виноуров, «Уус-Алдан суоллара» ААО директора Г.Н. Сивцев кырыйдылар. Бэлиэтээн эттэххэ, бу күн сүүсчэкэ киһи үөрүүлээх түгэҥҥэ кытынна.

Үөрүүлээх түгэнинэн Түүлээх спортивнай комплексыгар улахан кэнсиэр буолла. Ырыа, үҥкүү быыһыгар муоста тутааччылары наҕараадалаатылар, чиэстээтилэр. Бу икки муостаны тутан Түүлээх нэһилиэгэ 205 сыллаах, оскуола 95 сыллаах, оҕо саада 55 сыллаах үбүлүөйдэригэр улуус дьоһун бэлэх оҥорбутун нэһилиэк баһылыга С.В. Винокуров бэлиэтээн эттэ. Маны таһынан, Түүлээххэ тиэрдэр суолу халаан уута алдьаппатын туһуттан уу ааһар сирдэригэр элбэх турбалары укпуттар. Мантан саас, сайын Түүлээххэ диэри дьон эрэйдэммэккэ тиийэр буолла диэн олохтоохтор үөрүүлэрэ улахан.