«Балансы» диэн ааттаах сиргэ муус аннынан балыктааһын илин-кэлин түсүһүүтэ буолла. Балыксыттарга судургута суох сорудах бэрилиннэ. Ол курдук, кинилэр 2 чаас иһигэр элбэҕи балыктыахтаахтар. Төһө да уустук күрэхтэһии буоллар, дьахтар аймах бу көхтөөх уонна кэрэхсэбиллээх күрэхтэһииттэн туора турбата. Барыта аҕыс хамаанда бастыҥ буолар туһугар сатабалын, үөрүйэҕин хото туһанна. «Тимур и его команда» хамаандаттан кыттыбыт  Айталина Атласова бастакы балыгы хаптарда. Онон «Первый улов» ааты бигэтик ылла. «Сайдыы» хамаандатыттан кыттыбыт Старкова Ньургуйаана  «Самая большая рыба» ааты ылан үөрүүтэ үрдээтэ.

Оттон Мария Федотова («Творчество») «Опытный рыболов» ааты эрэллээхтик ылла. Ити курдук, саамай эдэр балыксыттар, көхтөх кыттааччылар бары биһирэннилэр.

Балыгын ахсаанынан уонна ыйааһынынан  Неустроев Айаал («Сайдыы») тэҥнээҕин булбата. Иккис миэстэни Мария Федотова(«Творчество») ылан, үөрүү өрөгөйүн биллэ. Оттон  Андрея Герасименко («Хотугу Бөрөлөр») үһүс миэстэҕэ тигистэ.

Хамаанданан күрэхтэһиигэ «Сайдыы» - бастакы, «Хотугу бөрөлөр» — иккис, «Творчество» үһүс миэстэны ыллылар. Кыайыы көтөллөммүт хамаанда кубоктарынан, мэтээллэринэн, грамоталарынан уонна сыл аҥаарыгар «Байанай» сурунаалга суруйтарар бирииһи ыллылар.

Балыктааһыны таһынан хамаандалар хомуур хапсаҕайга, тириини ыраах быраҕыыга күрэхтэстилэр. Бу тэрээһин ылбыт тэтимин ыһыктыбакка, эһиил эмиэ ыытыллыаҕа. Ити курдук, үгэскэ кубулуйбута кыттааччылары да, сүгүрүйээччилэри да үөрдэр.