СӨ ыччат дьыалатыгар уонна дьиэ кэргэн политикатыгар министрэ Афанасий Владимиров, СӨ дьахталларын общественнай тэрилтэтин түмсүүтүн бэрэссэдээтэлэ Валентина Кириллина уонна улуус общественнай тэрилтэлэрин бэрэстэбиитэллэрэ кытыннылар.

Хаһыат кылаабынай редактора Чокуур Гаврильев общественнай тэрилтэлэр бигэ туруктаах дьиэ кэргэн элбииригэр улахан өҥөлөөхтөрүн, «Саха сирэ» хаһыат үтүө үлэлээх общественнай тэрилтэлэр туһунан үгүстүк суруйарын, дьиэ кэргэн проблематын сырдатарын туһунан бэлиэтээтэ.

Министр Афанасий Владимиров министерство иһинэн дьиэ кэргэн политикатыгар отдел бу хайысхаҕа үлэлэһэрин, олохтоох дьаһалталары кытары ыкса сибээстээхтэрин, общественнай тэрилтэлэри грант нөҥүө көҕүлүүллэрин туһунан кэпсээтэ. Холобура, Горнай улууһун Маҕарас нэһилиэгэ чөл олох тирэҕин киинэ буолар, чөл олоҕу үтүө түмүктээхтик пропагандалыылларын иһин 1 мөл. суумалаах грант ылбыттар. Афанасий Владимиров сахаларга сис ыал диэн өйдөбүл күүстээҕин, үтүө дьоһун-мааны ыал холобуругар олоҕуран эдэр дьиэ кэргэни иитиэххэ наадатын бэлиэтээтэ.

Хаҥалас улууһун Өктөм нэһилиэгин эдэр ыалларын кулуубун председателэ Светлана Ксенофонтова оҕо сэттэ сааһыгар диэри майгыта олохтонорун, олоҕу көрүүтэ түстэнэрин, ол кэми эдэр төрөппүттэр үлэлиир буолан, куоттаран кэбиһэлэрин туһунан эттэ. «Оҕо саадыттан бигэ туруктаах дьиэ кэргэн туһунан өйдөбүл биэриэххэ наада», – диэн эттэ. Оттон кинилэр кулууптара Союз саҕана оскуолаҕа үөрэтиллэр «Этика семейной психологии» уруогу сөргүтэн, оскуолаҕа кылаас чаас ыыталларын туһунан кэпсээтэ.

«Нам улууһа чөл олох иһин» общественнай тэрилтэ директора Любовь Маркова азия норуоттарын холобуругар олоҕуран, норуокка ытыктанар айыы үөрэҕин сырдатааччылара эдэр дьоҥҥо ыал буолуохтарын иннинэ сүбэлииллэрэ-амалыыллара көдьүүстээх буолуоҕун бэлиэтээтэ.

СӨ идэлээх сойуустарын федерациятын бэрэссэдээтэлин солбуйааччы Валентина Кириллина төрөппүттэр оҕолорун иитиитин оскуола педагогтарыгар, психологтарыгар сэлээннииллэрэ сатаммат диэн бэйэтин санаатын эттэ.

Иһэр-аһыыр ыаллар кытары хайдах үлэлэһэбит диэн боппуруоска Өктөм дьахталларын сэбиэтин бэрэссэдээтэлэ Аграфена Олесова бэйэтин санаатын кытта үллэһиннэ: «Ханнык баҕарар киһи, ким да киниэхэ аахайбат буоллаҕына, санаата түһэр. Биһиги ол иһин соччото суох дьаһанан олорор ыалларбытыгар кэрийэ сылдьан лекция аахпакка, дьүүлгэ тардыбакка, общественнай олоххо кыттыһыннарабыт. Ол курдук, бастаан кинилэргэ олох-дьаһах туһунан кэпсэтии киэһэтигэр олус үчүгэй ыҥырыы оҥорон ыыталаабыппыт. Болдьообут кэммитигэр ийэлэрбит киэргэнэн, сирэйдэрэ-харахтара сырдаан тиийэн кэлбиттэрэ. Бары истиҥ баҕайытык ол киэһэ кэпсэппиппит. Арыгы тиэмэтэ таарыллыбатаҕа. Онтон ыла ийэлэр үөрүүнү кытта нэһилиэк общественнай олоҕор кыттыһаллар. Киһи бэйэтин наадалаах, туһалаах курдук сананнаҕына сүөм үрдүүр ээ».

Горнай улууһун Маҕарас баһылыгын солбуйааччы Ольга Никанорова нэһилиэктэригэр баар общественнай тэрилтэлэр кинилэр үлэлэригэр олус көмөлөһөллөрүн бэлиэтээтэ. Олохтоох бюджеттарыттан сылын аайы 100 тыһ. солк. общественнай тэрилтэлэригэр анааран биэрэллэрин, арыгыта суох сыбаайба тэрийии уопутун тарҕатар сыалтан, арыгыта суох уруу тэрийээччилэргэ 5 тыһ. солк. бэлэхтииллэрин уонна «Күбэйэ» эбээлэр түмсүүлэрин көдьүүстээх үлэлэрин туһунан кэпсээтэ.

Маҕарас олохтооҕо, элбэх оҕолоох ийэ Анна Кожемякина оҕо иитиитигэр санаатын эттэ: «Биһиги сэттэ уол оҕолоохпут уонна биир кыыстаахпыт. Уолаттарбытын кыраларыттан үлэҕэ үөрэппиппит. Маныаха аҕабыт оруола улахан. Оттон кыыһым миигин сырса сылдьан ыал хаһаайката буоларга үөрэммитэ. Билигин уолаттарым ыаллар, этэҥҥэ олороллор. Биһиги кэргэмминээн иллээх дьиэ кэргэн буолан олорбуппут 41 сылыгар барда. Оҕолорбут биһиги олоххо сыһыаммытын көрө улааттылар. Оҕо – төрөппүт сиэркилэтэ. Онон бастатан туран төрөппүт үтүөтүк олоруохтаах».