Ол курдук, Ньукуолун күн хаһыат сүрүн эрэдээктэрэ Чокуур Гаврильев салайар ырытааччы-суруналыыстар бөлөхтөрө Горнай улууһугар сылдьан кэллэ. Эрдэттэн улуус дьаһалтатын кытта кэпсэтии барбыт буолан, нэһилиэктэр баһылыктарын кытта "Мунициапальнай боломуочуйалары тыырыы бэрээдэгэ" уонна "Горнай улууһугар арыгыны утары үлэ" диэн тиэмэҕэ "төгүрүк остуоллар" буоллулар. Бу тэрээһин туһунан политика салаатын ырытааччыта Аграфена Кузьмина хаһыакка сырдатыаҕа.

"Төгүрүк остуол" кэмигэр предпринимательство эйгэтин уонна социальнай боппуруостары ырытар суруналыыстар туһааннаах дьону кытта көрүстүлэр. Уопуттаах суруналыыс Надежда Егорова улуустааҕы "Кыым" диэн Инбэлииттэр уопсастыбаларын салайааччыта Анна Барашкованы, Мытаах орто оскуолатын араас сылларга кыһыл көмүс мэтээлинэн бүтэрбит үс оҕо аҕата Николай Осиповы, эдэр дьиэ кэргэттэр түмсүүлэрин салайар Ольга уонна Руслан Семеновтары, инбэлиит Семен Семеновы кытта көрсөн кэпсэттэ. Олор сотору кэминэн "Саха ыала" сыһыарыыга бэчээттэниэхтэрэ. Маны сэргэ "Саха сирэ" хаһыат үлэһиттэрэ Ангелида уонна Анатолий Осиповтар иллээх дьиэ кэргэттэригэр күүтүүлээх ыалдьыт буоллулар.

Горнайга 600-чэкэ предприниматель баара улууска бу салаа балысханнык сайдан эрэрин туоһулуур. Горнай улууһугар предпринимателлэри өйөөһүн киинин салайааччыта Мария Максимова иһитиннэрбитинэн, улууска преринимателлэри өйүүр уонна сүрүннүүр сэбиэт тэриллэн үлэлиир. Улуус бу салааҕа үлэтэ 2015 сылга дьоҕус бизнес тэрилтэлэрин өйүүр анал программаҕа олоҕурар. "Саха сирэ" хаһыат "Сатабыл" диэн предпринимателлэргэ туһуламмыт балаһатыгар предприниматель Вера Кесерова ыалдьыттыаҕа. Кини "Саха сирин кэрэ көстүүтэ -- Сиинэ өрүс" диэн турмаршрутун билиһиннэриэҕэ.

Суруналыыстар СӨ култууратын үтүөлээх үлэһитэ, художник модельер Августина Филиппова айар мастырыскыайыгар сырыттылар Августина Николаевна дизайн уонна прикладной искусство үөрэтэр-научнай лабораториятын тэрийэн айымньылаахтык үлэлии сылдьар. Кини "Чысхаан", "Кыһын", "Хаарчаана", "Сээркээн Сэһэн" диэн үлэлэрэ саха норуотун аан дойдуга аатырдар "туризм брендэ" диэн статустаннылар. Бүгүҥҥү күҥҥэ Августина Филиппованы туох долгутарый? Бу туһунан ааҕааччылар "Итии чэй" балаһаттан билиэхтэрэ.

Суруналыыстар десаннарын айымньылаах үлэлэрин түмүгүнэн "Горнай улууһа" МТ баһылыга Никита Андреев уонна "Саха сирэ" хаһыат сүрүн эрэдээктэрэ Чокуур Гаврильев бииргэ үлэлэһэргэ сөбүлэһии түһэристилэр.

Хаһыат эрэдээктэрэ Чокуур Гаврильев бу күн улуустааҕы араадьыйаҕа уонна телевидениеҕэ "Аһаҕас кэпсэтиигэ" кыттан, хаһыат үлэтин-хамнаһын билиһиннэрдэ, ааҕааччылар интэриэһиргээбит үгүс ыйытыыларыгар хоруйдаата.

Бэс ыйыгар ырытааччы-суруналыыстар Мэҥэ-Хаҥалас уонна Амма улуустарыгар сылдьыахтара.