Дьыала ис хоһооно

Дьыала ис хоһоонун бириигэбэргэ олоҕуран тиэрдэбин. Ол курдук, суут силиэстийэтэ быһаарбытынан, ааспыт сыл бэс ыйын 25 күнүгэр Таатта улууһун Ытык Күөл сэлиэнньэтигэр П. диэн киһи итирик туруктаах сылдьан, Ү. диэн табаарыһын дьиэтин саалатыгар Б. диэн киһини абааһы көрөр санааттан, соруйан эчэтээри, сутуругунан хаста да төбөҕө охсубут. Онтон Б. кинини муомахтыы сатаабытыгар, П. дьыбаантан бүк тутуллар быһаҕын ылан, Б.-ны 11-дэ быһаҕынан анньыбыт. Ол иһигэр, тыын суолталаах уорганнарыгар – моонньугар уонна түөһүгэр. Б. муостаҕа сууллан түспүтүгэр, биирдэ тохтообут. Сууттанааччы суут мунньаҕар буруйун сороҕун эрэ билиммит.

Силиэстийэ уорганнара дьыаланы РФ Холуобунай Кодексатын 30-с ыст. 3 чааһа -- 105-с ыст. 1 чааһынан, ол эбэтэр, киһини соруйан өлөрүүгэ холонуу бэлиэтэ баарынан тэрийбиттэр. Суут көрүүтүгэр дьыала ити ыстатыйанан бигэргэнэн барбыт.

Ол эрэн, суут ити ыстатыйаны 114-с ыстатыйа 1 чааһыгар, ол эбэтэр, бэйэни көмүскэнии кэриҥин аһара баран, киһи доруобуйатыгар ыарахан эмсэҕэлээһини соруйан оҥоруу диэҥҥэ уларыппыт. Уонна сууттанааччы П.-вы ити ыстатыйанан буруйдааҕынан билинэн, 10 ыйга көҥүлүн быһары усулуобунайынан ааҕан, биир сыл тургутар болдьоххо уурбут.(...)

 “Сэнэбиллээх, атаҕастабыллаах бириигэбэр”

Эмсэҕэлэммит киһи ойоҕо Елена (аата уларыйда – В.М) бэйэтин санаатын бу курдук этэр:

--Кэргэммин ыараханнык эчэппит киһи дьыалата Ытык Күөлгэ көрүллэн, бириигэбэр тохсунньу бүтүүтүгэр таҕыста. Судьуйа ааҕар бириигэбэрин истэ туран, “ама, бу кырдьык дуо?!” диэн шок ылан, тохтоло суох ытаабытым. Киһи сууттан кырдьыгы булбат эбит диэн олус кэлэйдим. Итинник судьуйа баарыттан сөхтүм. Эрдэттэн даҕаны, дьыалаҕа үрдүттэн сыһыаннаһара көстөр этэ гынан баран, итинник атаҕастабыллаах, сэнэбиллээх түмүгү таһаарыа диэн күүппэтэхпит.  

Суут мунньаҕын кэмигэр судьуйа илиитин төлөпүөнүттэн араарбакка, күлэ олорбут түгэннэрдээҕэ. Судьуйа бу дьайыытын СӨ Судьуйаларын квалификационнай коллегиятыгар үҥсэр санаалаахпыт. Болҕомтото төлөпүөнүгэр ууруллан, ол кэмҥэ кини дьон көрдөрүүтүн истибитэ буолуо дуо? Ол аата кини эрдэттэн бу дьыалаҕа быһаарыы ылан олорбут диэн сабаҕалыахха сөп. Мин эрим улаханнык эчэйэн, бэйэтэ көрдөрүү биэрэр, көмүскэнэр кыаҕа суох буолан, судьуйа аҥардас сууттанааччы эрэ көрдөрүүтүн ылынна, онно олоҕуран, уураах таһаарда.

Буруйу оҥорбут киһи бэйэтин көмүскэнэрэ – биллэр дьыала. Силиэстийэ кэмигэр П. биэрбит көрдөрүүтэ дакаастамматаҕа буруйдуур түмүккэ сурулла сылдьар. Кини кэргэммин ойоҕосторо арахсыар, мэйиитэ доргуйуор диэри кырбаабытын, 11-дэ быһаҕынан анньыбытын түмүгэр, кэргэним I группалаах инбэлиит буолла. (...)

Вера Макарова ыстатыйатын сиһилии «Саха сирэ» хаһыат чэппиэрдээҕи нүөмэригэр ааҕыҥ.