Манна уран тарбахтаах маастардар, ону сэргэ иискэ, араас айылҕа матырыйаалыттан кэрэни айар дьарыктаах дьон муһунна. Бастакы тэрээһиҥҥэ Сыбаатайтан, Эбээхтэн уонна Хатыҥнаахтан ураты бары нэһилиэктэр кыттыыны ыллылар.

Киһи кэрэхсиирэ, бу күн 25 киһи уопсайа 231 оҥоһугун быыстапкаҕа туруорда. Көрүҥнэрэ араас: эбээн национальнай ииһиттэн саҕалаан айылҕа матырыйаалыттан араас оҥоһуктарга, хаартысканан түһэриигэ, оҕуруонан тиһиигэ, быысабайга, уруһуйга, кумааҕыга выжиганиеҕа, сабынан баайыыга, саха таҥаһын тигиигэ, мельхиор киэргэллэргэ, сылгы сиэлин оҥоһуктарыгар, бэл диэтэр ынах куртаҕыттан сумочкаҕа тиийэ. Киһи бу кэрэ ортотугар сылдьан хараҕа үөрэр, дууһата сылаанньыйар.

Көрсүһүүгэ уран тарбахтаах маастардарбыт санааларын аһаҕастык үллэһиннилэр, кыһалҕаларын этиннилэр, үлэ уопутун кэпсэттилэр. Онон тэрээһин туруоруммут соругунситэн, кэлэр көрсүһүүлэр тиһигин быспакка ыытылла туралларыгар олук буолла.