Манна быйыл 112 оҕо 105 араас темаҕа үлэлэрин аҕалан көмүскээтилэр. Улуус 11 оскуолата барыта кытынна. Үлэлэри 32 эксперт сыаналаата. Ону кытта Россия Наукатын Академиятын В.П.Ларионов аатынан физико-техническэй кыһалҕаларга институт Сибиирдээҕи салаатын научнай сотруднига Николай Николаевич Харбин уонна историческай наука кандидата, Гуманитарнай чинчийэр институт этно-социологияҕа секторын научнай үлэһитэ, В.П.Ларионов аатынан “Инникигэ хардыы” республикатааҕы НПК экспердэ Яна Михайловна Санникова кэлэн кыттыыны ыллылар, сүбэ-ама биэрдилэр, экспердэри кытта үлэлээтилэр.

Үгэс быһыытынан конференция 6 секциянан ыытылынна. Ол курдук, үлэлэр филология, естественнэй, социальнай наукалар, медицина уонна экология, техника уонна технология, кыраайы үөрэтии хайысхаларынан наарданан көмүскэннилэр.

Быйылгы НПК саҥа сүүрээнинэн доруобуйатынан хааччахтаах оҕолорго легоконструирование түһүмэҕэ киирдэ. Маны таһынан үһүс сылын оҕолор үлэлэрин английскайдыы тылбаастаан көмүскээтилэр.

Экспертнэй хамыыһыйа бэрэссэдээтэлэ А.И.Третьякова бэлиэтээбитинэн, сыллата оҕолор үлэлэрин таһыма үрдээн иһэр эбит. НПК чэрчитинэн иккис сылын логическай оонньуулар буоллулар. Манна 96 оҕо кытынна.

Саҥа сүүрээнинэн “Бизнес-бырайыактары” көрүү буолла. Манна түмүк хамаанданан таһаарылынна. Ол курдук, үһүс миэстэни Эбээх уонна Ойуһардаах оскуолалара үллэһиннилэр. Иккис миэстэҕэ Орто Халыма куорат оскуолата таҕыста, оттон кыайыылааҕынан Сыбаатай оскуолатын хамаандата буолла.

Итини таһынан быйыл Кыайыы 70 сылыгар анаан сэрии тематыгар үлэлээбит оҕолорго анал номинация олохтонно.