Конференцияҕа үөрэнээччилэр 6 секциянан үлэлиэхтэрэ. Ол курдук, социальнай, естественнэй наукалар, кыраайы үөрэтии, филология, медицина уонна экология, техника уонна технология хайысхаларга үлэлэрин билиһиннэриэхтэрэ.

Оҕолор үлэлэрин экспердэр сыаналыахтара. Экспердэри сэргэ историческай наука кандидата, Гуманитарнай чинчийэр институт этно-социологияҕа секторын научнай үлэһитэ, В.П.Ларионов аатынан „Инникигэ хардыы“ республикатааҕы научнай-практическай конференция экспердэ Яна Санникова уонна Россия Наукатын академиятын Сибиирдээҕи салаатын В.П.Ларионов аатынан физико-техническэй проблемаларга институт научнай үлэһитэ, „Инникигэ хардыы“ экспердэ Николай Харбин эмиэ оҕолор үлэлэрин истиэхтэрэ-көрүөхтэрэ. Маны таһынан чинчийэр үлэ салайааччыларыгар, учууталларга, төрөппүттэргэ уонна оҕолорго семинар ыытыахтара, консультация оҥоруохтара.

Конференция кэмигэр бизнес-бырайыакка, толкуйга, омук тылыгар „My first projects in english“ диэн куонкурустар ыытыллыахтара, техническэй быыстапка тэриллиэҕэ.

Туспа бырагырааманан легонан конструированиеҕа куонкурус буолуоҕа. Конференция түмүгүнэн бастыҥ үлэлээх үөрэнээччилэр кэлэр сылга ыытыллыахтаах „Инникигэ хардыыга“ кыттарга мэктиэлэниэхтэрэ.