«Оҕо саадын дьиэтэ олус эргэ этэ, онон саахалланар туруктааҕынан, 2009 сыллаахха саҥа дьиэни тутар туһунан быһаарыы ылыллыбыта», - диэн кэпсиир «Кыымчаан» оҕо саадын сэбиэдиссэйэ Яна Захарова.

Яна Васильевна эппитинэн, урут оҕо саада үс куорпустааҕа: сүрүн куорпус, куухуна уонна биир бөлөх дьарыктанар туспа турар дьиэтэ. «Ол, биллэн туран, үлэлииргэ табыгаһа суоҕа. Кырачааннары аһатаары аспытын бииртэн биир сиргэ көһөрөргө күһэллэрбит». Ону таһынан, оҕо саада толору хааччыллыыта суоҕа.

Билигин толору хаачыллыылаах таас дьиэ дьэндэйдэ. Сүрүн бэдэрээтчигинэн Геннадий Степанов салайааччылаах «Атлант» фирма үлэлээбитэ. Тутааччылар акылаатын түһэрбиттэрэ, көҥдөйүн таһаарбыттара. Онтон атынын – устукатууркатын, нарылааһынын, кырааскалааһынын – оҕо саадын үлэһиттэрэ, сэлиэнньэ олохтоохторо бэйэлэрэ оҥорбуттара.

«Уоппускабытын аахсыбакка, икки сменанан үлэлээбиппит. Бэйэбитигэр уонна оҕолорбутугар тутар буоламмыт, олус кыһаллыбыппыт», - диэн ахтар Яна Васильевна.

Улуус баһылыга Георгий Герасимов архитектор Сардаана Константинова бырайыагынан тутуу үс сыл барбытын этэр. Тутууну «Мин Сахам сирэ XXI үйэҕэ» өрөспүүбүлүкэтээҕи хамсааһын уонна улуус кыттыһан үбүлээбиттэр.

Билигин саҥа оҕо саадыгар 73 кырачаан сылдьар.

Бу сайын тутулла турар оҕо саадыгар сенатор Вячеслав Штыров сылдьыбыта. Онно кини:«Бу мэҥэ-алданнар бэйэлэрин уонна ыччаттарын кэскиллэрин төрөөбүт сэлиэнньэлэрин кытта ыкса ситимнииллэрин туоһулуур», - диэн бэлиэтээн эппитэ.

Санатар буоллахха, «Мин Сахам сирэ XXI үйэҕэ» өрөспүүбүлүкэтээҕи хамсааһын чэрчитинэн 2014 сылга олорор дьиэни уонна соцобъектары тутууга 403 мөл. солк. көрүллүбүтэ. Быйыл 133 объект тутуллара былааннаммытыттан 25-һэ – олорор дьиэ.