Үөрүүлээх сиэргэ-туомҥа СР Правительствотын председателин солбуйааччы В.В. Омуков, нэһилиэнньэ олоҕор куттала суох буолуутун хааччыйыыга госкомитет салайааччыта Ю.Н. Зайцев, республика баһаарынай сулууспатын баһылыга И.Н. Николаев, Ил Түмэн депутаттара А.И. Еремеев, Н.И. Румянцев, Нам улууһун баһылыга А.П. Атласов, о.д.а. кыттыыны ыллылар.

Үөрүүлээх быһыыга-майгыга бочуоттаах ыалдьыттар икки мэндиэмэннээх дьиэҕэ киирии лиэнтэни быстылар, ол кэннэ тэрээһин кыттыылаахтара биирдии кабинетынан, анал хосторунан сылдьан көрдүлэр-иһиттилэр, баһаарынньыктар үлэлииргэ, сынньанарга толору усулуобуйалаах дьиэлэммиттэрин астына бэлиэтээтилэр.

Сахалыы сиэри-туому тутуһан баһаарынай депо аһыллыытын алгысчыт Ф. Соловьев иилээн-саҕалаан ыытта. Ол кэннэ депо киэҥ-куоҥ сиригэр, түөрт массыына турарыгар аналлаах гаражка тэрээһин үөрүүлээх чааһа буолла. СР Правительствотын Махтал суругунан Намнааҕы баһаарынай чаас начальнига И.В. Колпашников бэлиэтэннэ, улуус баһылыга киниэхэ "Улуус Ытык киһитэ" бочуоттаах аат иҥэриллибитин иһитиннэрдэ. Мантан салгыы баһаарынай чаас үлэһиттэригэр наҕараадалары туттардылар.

Эҕэрдэлээбит дьон баһаарынай чаас байыастарыгар үлэлэригэр үгүс түбүгү көрсүбэттэригэр, дьон-сэргэ нус-хас олоҕун араҥаччылыыр соруктарын чиэстээхтик толороллоругар баҕа санааларын эттилэр.