Бу үөрүүлээх күҥҥэ дьиэ хаһаайыттарын эҕэрдэлии «Нам улууһа» МТ баһылыга Александр Атласов, Ил Түмэн депутата Николай Румянцев, Ил Түмэн Государственнай мунньаҕын тутууга уонна сокуону таһаарыыга комитетын председателэ Алексей Еремеев, СР Үөрэҕин министерствотын опека уонна попечительство отделын начальнигын солбуйааччы Ольга Алексеева, СР Ыччат министерствотын дьиэ кэргэн демографическай политика отделын сүрүннүүр специалиһа Татьяна Слепцова, «Ленскэй нэһилиэк» МТ баһылыга Андрей Новгородов уо.д.а. эҕэрдэлээтилэр.

Улуус баһылыга Александр Атласов квартира ылбыт дьоҥҥо 5 тыһ. суумалаах сертификаты туттарда, Ленскэй нэһилиэк баһылыга Андрей Новгородов оҕо оонньуур площадкатын бэлэхтээтэ. Николай Румянцев, Хатыҥ Арыы нэһилиэгин баһылыгын солбуйааччы Г.Г. Марков Үөдэй нэһилиэгин баһылыгын солбуйааччы И.М. Свинобоев, Хатырык, Модут, 1 Хомустаах нэһилиэктэрин баһылыктара А.М. Пинигин, Г.Д. Шамаев, В.Г.Жирков бэйэлэрин эҕэрдэлэрин тириэртилэр уонна сэмэй бэлэхтэрин туттартаатылар. Тутааччылары улуус дьаһалтатын, Ил Түмэн Махтал суруктарынан наҕараадалаатылар.

Петр Матвеев, «Регион-строй» ХЭТ дириэктэрэ: «Куонкуруска кыайан бу 15 квартиралаах дьиэ тутуутун 2014 сыл алтынньытыттан саҕалаабыппыт. Ахсынньыга диэри дьиэ көҥдөйүн таһаарбыппыт, кырыыһатын саппыппыт уонна тохсунньуга итиитин холбообуппут. Оҕолору дьиэлэммиттэринэн эҕэрдэлиибин уонна этэҥҥэ олороллоругар баҕарабын».

Владимир Охлопков (Хатырык): «Толору хааччыллыылаах дьиэ ылбыппыт биһиги дьиэ кэргэҥҥэ улахан үөрүү. Кэргэннээхпин, кыыс оҕолоохпут. Түгэнинэн туһанан Намнааҕы опека уонна попечительство отделын начальнигар Мария Иннокентьевнаҕа, улуус дьаһалтатыгар, тутааччыларга уонна бу дьиэ тутуллуутугар күүс-көмө буолбут дьоҥҥо улахан махталбытын тириэрдэбит».

Айталина Гаврильева (Нам): «Үөрэхпин бүтэрэн Дьокуускайга үлэлиибин. Куоракка дьиэ куортамнаан олоробун. Дьиэ биэрбиттэриттэн олуһун үөрбүтүм. Онон төрөөбүт-үөскээбит Наммар көһөн кэлэн үлэлиир былааннаахпын. Улуус дьаһалтатыгар уонна бары бу үлэҕэ кыттыспыт тэрилтэргэ махтанабын».

Бу курдук, саҥа дьиэҕэ тиксибит оҕолор үөрүүлэрэ улахан. Кинилэр «Тулаайах оҕолору дьиэнэн хааччыйыы» программа баарын биһирииллэр уонна республика салалтатыгар, улуус дьаһалтатыгар, тутааччыларга махталларын тириэрдэллэр.