Үөрүүлээх сиэргэ-туомҥа республика баһаарынай сулууспатыттан Айаал Махардыров, Анатолий Протопопов, улуус баһылыга Михаил Никулин, Муома улууһун баһылыгын солбуйааччыта Владимир Егоров, Чокурдах бөһүөлэгин баһылыга Александра Майзик, Муома, Аллайыаха улуустарын баһаарынай чаастарын байыастара, общественность кыттыыны ыллылар.

Ыҥырыылаах ыалдьыттар саҥа таас дьиэҕэ киирии лиэнтэни быстылар. Саҥа дьиэ символическай күлүүһэ депо начальнига Юрий Шамаевка туттарылынна. Ол кэннэ тэрээһин кыттыылаахтара биирдии кабинетынан, анал хосторунан сылдьан көрдүлэр-иһиттилэр, баһаарынньыктар үлэлииргэ, сынньанарга толору усулуобуйалаах дьиэлэммиттэрин астына бэлиэтээтилэр.

Депо киэҥ-куоҥ сиригэр, түөрт массыына турарыгар аналлаах гаражка тэрээһин үөрүүлээх чааһа буолла. Сахалыы сиэри-туому тутуһан баһаарынай депо аһыллыытын алгысчыт Аида Стручкова иилээн-саҕалаан ыытта. Алгысчыт күндү ыалдьыттары сахалыы уохтаах кымыһынан, арыылаах алаадьынан айах тутта. Хас биирдии ыалдьыт үтүө санаатын бэлиэтин салама ыйаата. «Абыйчаана» образцовай ансаамбыл кыра иитиллээччилэрэ мустубут дьону эҕэрдэлээн үҥкүүлэрин бэлэх ууннулар.

Улуус баһылыга Михаил Никулин, Муома улууһун баһылыгын бастакы солбуйааччы Владимир Егоров, Чокурдах бөһүөлэгин баһылыга Александра Майзик, Дьокуускайтан, ыаллыы улуустартан кэлбит ыалдьыттар эҕэрдэлэрин тириэртилэр, баһаарынай чаас байыастарыгар үлэлэригэр үгүс түбүгү көрсүбэттэригэр, дьон-сэргэ нус-хас олоҕун араҥаччылыыр соруктарын чиэстээхтик толороллоругар баҕа санааларын эттилэр. Баһаарынай чаас начальнига Юрий Шамаев ыалдьыттарга махталын тириэртэ.

Бэлиэтээн эттэххэ, икки күн Индигир улуустарын баһаарынай чаастарын байыастарын спартакиадата ыытыллыбыта. Мантан салгыы баһаарынай чаас үлэһиттэрин Абый улууһун баһаарынай гарнизонун начальнига Юрий Шамаев спартакиада түмүгүн таһаарар уонна үс улуус доҕордуу киэһэтигэр ыҥырда.