Акана нэһилиэгэ Ньурба улууһун кырдьаҕас нэһилиэктэриттэн биирдэстэрэ. Барыта 580 киһи олорор. Чкалов оскуолатын кытта холбоон 67 оҕо оскуолаҕа үөрэнэр. Акана нэһилиэгин социальнай эбийиэктэрэ барыта кэриэтэ саҥалыы тутуулар.

Толору хааччыллыылаах, билиҥҥи кэм ирдэбилигэр бары өттүнэн эппиэттиир саҥа оҕо саадын Николай Егоров бэдэрээтчиктээх олохтоохтор биригээдэлэрэ туппут. Үбүлээһинин «Үтүө дьыала» чэрчитинэн уонна нэһилиэк, оройуон үп тыыран барыта 22 мөлүйүөн суумалаах үлэ барбыт.

«Мичээр» оҕо саада 35 миэстэлээх. Оттон билиҥҥитэ 30 оҕо сылдьар. Олохтоохтор да, үлэһиттэр да маннык сырдык, сылаас дьиэлэнэннэр үөрүүлэрэ үгүс.

Аны быйылгы сылга, аканалар «Үтүө дьыала» программа чэрчитинэн, специалистарга анаан түөрт квартиралаах дьиэни тутар былааннаахтар.