Тупсаҕай көстүүлээх «Күнчээн» оҕо саада оскуолаттан чугас, саҥа бөһүөлэк хабыллар хаба ортотугар киэркэйэн турар. Оҕо саадын Николай Шишигин генеральнай директордаах «Авангард» ХЭТ үлэһиттэрэ ааспыт сыл бэс ыйын 6 күнүттэн саҕалаан туппуттар. Объект бырайыага республикаҕа ханна да суох, онон «пилотнай» диэн буолар. Бэдэрээтчит Николай Михайлович инникитин да маннык бырайыактаах оҕо саадтарын тутуохпут диэн эрэннэрдэ.

Агротехническэй хайысхалаах саҥа уһуйааны аал уотунан арчылаан, алаадьылаах кымыһынан айах тутан, алгыс тылынан астылар.

Улуус баһылыга Николай Старостин тыа сирин кэлимсэ сайдыытын программата олоххо көдьүүстээхтик киллэриллэрин иһэрин инникитин Лоомтукаҕа, Майаҕа, Аллараа Бэстээххэ, Төҥүлүгэ уо.д.а. нэһилиэктэргэ саҥа оҕо саадтарын туттарыы салҕаан ыытыллыаҕа диэн эттэ.

Оҕо саадын коллективыгар, кырачааннарга, төрөппүттэргэ эҕэрдэ бастыҥын СР Үөрэҕин министерствотын кылаабынай специалиһа Ольга Захарова, Ил Түмэн депуттаттара Александр Романов, Юрий Баишев, үөрэх управлениетын салайааччы Михаил Колмаков уонна Ороссолуода нэһилиэгин баһылыга Илья Макаров тиэртилэр.

Бу күн улуус баһылыгын Махтал суруга «Авангард» ХЭТ крановщигар Василий Шариҥҥа, СР Үөрэҕин министерствотын Бочуотунай грамотата иитээччилэргэ Прасковья Игнатьеваҕа, Маргарита Копыловаҕа, министерство Махтал суругун иитээччи көмөлөһөөччүтүгэр Сардаана Григорьеваҕа, Ил Түмэн Бочуотунай грамотатын сэбиэдиссэй Акулина Мартыноваҕа, иитээччи көмөлөһөөччүтүгэр Варвара Соловьеваҕа, үөрэх управлениетын Бочуотунай грамотата иитээччигэ Алла Белолюбскаяҕа, хаһаайыстыбаннай чаас сэбиэдиссэйигэр Мария Петроваҕа, управление Махтал суруга «Авангард» ХЭТ директорыгар Николай Шишигиҥҥэ, тэрилтэ инженеригэр Евгений Захаровка, нэһилиэк Махтал суруктара «Авангард» ХЭТ үлэһиттэригэр Александр Баишевка уонна Григорий Кривошапкиҥҥа туттарылыннылар.