Генеральнай бэдэрээтчигинэн Дьокуускайтан Михаил Катиев салайааччылаах «Якутсельстрой» тэрилтэ үлэлээтэ. Улуус дьаһалтатын баһылыга Иван Семенов үп-харчы көрөн, тутуу матырыйааллара «Анаабыр алмаастара» ААУо көмөтүнэн самолетунан, уу суолунан аҕалыллан, үлэ кылгас кэм иһигэр үмүрүтүлүннэ.

Таджик уонна олохтоох бэйэбит уолаттарбыт балтараа ый иһигэр эргэ истиэнэлэри көтүрэн, кафелин тупсаҕай көстүүлээҕинэн солбуйан, стеклопакет түннүктэри туруоран, уот ситимин саҥардан оҥордулар. Саҥа баанньыкка алта үстүү миэстэлээх кабинкалар туруоруллубуттар.

Баанньык үлэтин Радий Николаев салайааччылаах улуустааҕы «КомУслуга» тэрилтэ сүрүннүөҕэ. Олохтоохтор баҕаларын учуоттаан уопсай суунууну сэргэ, сакааска үлэлэһиэхтэрэ. Маны тэҥэ саҥа күүс-уох ылан эрчимириэн, сынньаныан баҕалаахтар сауна өҥөтүнэн туһаныахтара.

Ити курдук, Сааскылаахха Саҥа дьыл саҕаланаары турдаҕына, улуус дьаһалтата, «Анаабыр алмаастара» хампаанньа олохтоохторго бэртээхэй бэлэх оҥордулар.