Суруйааччы Д.С.Федоров - Дмитрий Таас аата умнуллубат

Аҕыйах хонуктааҕыта Мэҥэ-Хаҥалас Хорообут нэһилиэгэр улууспут бастакы суруйааччыта Д.С.Федоров–Дмитрий Таас төрөөбүтэ 100 сыла үөрүүлээхтик бэлиэтэннэ. Тэрээһин Дмитрий Самсонович төрөөбүт өтөҕүн таһыгар Атах Бүтэйгэ обелиска сүгүрүйүүттэн, сибэкки дьөрбөлөрүн уурууттан саҕаланна.

Тэрээһин ыалдьыттара оскуолаҕа саха тылын уонна литературатын музей-лаборатория кабинетыгар, оскуоланы бүтэрбиттэргэ уонна Дьөһөгөйгө анаммыт музейдарга сырыттылар.
Дмитрий Таас дьоно олорбут сайылыктарыттан көһөрүллэн аҕалыллыбыт дьиэ билигин бөһүөлэккэ турар. Ол дьиэ таһыгар суруйааччы олорбутун туоһулуур мемориальнай дуоска саайылынна. Биир дойдулааҕа Иннокентий Петров суруйааччы чугас дьонун туһунан ахтан-санаан ааста.
Суруйааччы үбүлүөйдээх сылыгар сөп түбэһиннэрэн "Дмитрий Таас. Хоһооннор", "Д.С.Федоров–Дмитрий Таас: ахтыылар, ыстатыйалар, бэлиэтээһиннэр" диэн кинигэлэр М.И.Птицына уонна Е.Е.Трофимова бэлэмнээн ХИФУ кинигэтин кыһатыгар таһаартардыбыт.
Саҥа кинигэлэри оройуон салалтата, улуустааҕы үөрэх уонна культура управлениелара үбүлээтилэр. Суруйааччы бастаан литератураҕа хоһоонньут быһыытынан киирбитэ. Онон кини 30–40-с сыллардааҕы хоһооннорун түмэн итиэннэ иккис кинигэҕэ кини аатын үйэтитиигэ турууласпыт биир дойдулаахпыт Россия Суруйааччыларын союһун чилиэнэ Василий Скрябин-Идэлги таһаартарбыт кинигэтэ уонна Таас туһунан ахтыылар, ыстатыйалар, библиографическай ыйынньык, суруйааччы олоҕуттан хаартыскалар киллэрилиннилэр.
Быйыл “Бичик” кинигэ кыһата суруйааччы “Кыһыл көмүс хоруоп” сэһэнин “Быһылаан” диэн серияҕа бэчээттээн таһааран ааҕааччылары үөртэ.

Улуустааҕы киин библиотека коллектива суруйааччы айар үлэтин көрдөрөр мультимедийнэй дискэни бэлэмнээтэ. Аныгы технология сайдыытынан оскуола үөрэнээччилэригэр, учууталларга, литератураны сэҥээрээччилэргэ ити ураты бэлэҕинэн буолла.
“Сырдык аартыгынан...” “төгүрүк остуолга” Саха сирин Суруйааччыларын союһуттан “Чолбон” сурунаал редактора Николай Винокуров–Урсун, саха народнай суруйааччыта Семен Попов–Тумат, оҕо суруйааччыта Константин Сосин, ХИФУ музейын сэбиэдиссэйэ Полина Егорова, СР Суруйааччыларын союһун чилиэнэ Степан Марков, улуус баһылыгын бастакы солбуйааччы Семен Потапов, улуус баһылыгын социальнай боппуруостарга солбуйааччы Иван Птицын, улуус культураҕа уонна духуобунай сайдыыга управлениетын начальнигын солбуйааччы Надежда Максимова, улуустааҕы үөрэх управлениетын начальнигын солбуйааччы Николай Тарасов, үөрэх үлэһиттэрин профсоюһун бэрэссэдээтэлэ Степан Андреев, “Таммахтар” литературнай холбоһук салайааччыта Августина Владимирова, улуустааҕы киин библиотека директора Елизавета Корнилова, Хорообут нэһилиэгин баһылыга Валерий Колосов, оскуола директора Иннокентий Тастыгин о.д.а. кыттыыны ыллылар.