Оптуорунньук күн, билэр диспетчерскэй сулууспабар эрийэн, такси сакаастаатым. Сымнаҕас олбохтоох, киэҥ-куоҥ омук микро-оптуобуһа болдьоммут чааһыгар кэлэрин эрэннэрдилэр. Киэһэ алта чааска кэлиэхтээх массыынам тоҕус саҕана биирдэ кэллэ. Ону даҕаны чаас аҥарын быһа таһаҕаһын тиэнэн, барытын күөх салапаанынан бүрүйэн, массыынабыт «хайа» саҕа буола түстэ.

Ыгыччы симиллэн, икки суоппары ааҕан туран, барыта 10 киһи буолан, куораттан таҕыстыбыт. Бэрт түргэнник Горнай Маҕараһыгар тиийдибит. Үөрэн-көтөн киэһэҥи аһылыкпытын аһаан баран, салгыы айаҥҥа туруннубут. Арай сотору буолаат, туох эрэ умайбыт сыта кэлэн, массыынабыт иһэ буруонан туолла. Хайа, бу туох үлүгэрэ буолла диэн, массыынаны тохтоттубут. Онтубут радиаторын уута оргуйбут эбит. Суоппар уолаттар (биирэ эдэр, иккиһэ арыый саастаах) биһигиттэн ыраас уу көрдөөннөр, ону куттулар да туһа тахсыбата.

Бу түүн ордук тымныйан, массыынабыт начаас үлүгэр сойон барда. Буруоҕа тумнастымаары ааммытын төттөрү-таары аһан-сабан, салгылаттыбыт. Сорохпут таһырдьа сибиэһэй салгыҥҥа сылдьа сатаата да, бытархан тымныыттан куотан, төттөрү массыынабытыгар симилиннибит. Саатар түүн үөһэ буолан, массыына да аҕыйах. Аны «тосуол» көстөн биэрбэтэ. Дьиҥэр, ыраах айаҥҥа сылдьар суоппардар саппаас чаастарын, ууларын-хаардарын барытын укта сылдьыа эбиттэр да, мэлигир. Уонтан тахса массыына тохтообутуттан, «тосуол» биир эрэ киһиэхэ баар буолан биэрдэ. Уолаттар ону кутуннулар да, туһа тахсыбата. Барыта таһынан сүүрэ турар аатырда. Чаастан ордук тымныы массыынаҕа олоро сатаан баран, төттөрү Маҕараска барарга сананныбыт.

Дьокуускай диэки ааһар массыыналары «куоластыы» сатаатыбыт. Сорохтор хаһыытаппытынан ааһа турдулар. Атыттарга миэстэтэ суох аатырдылар. Таһырдьа тура сатаан баран, төттөрү массыынабытыгар киирдибит. Бу олорон араас санаа-оноо барыта киирдэ. Мэктиэтигэр, били Михаил Лукачевскай «Белый день» киинэтэ харахпар көстөн ааста. Ол хартыына хатыламматын эрэ дии санаатым...

Сиһилии «Саха сирэ» хаһыат ахсынньы 11 күнүнээҕи нүөмэригэр ааҕыҥ.