Сонун, сэргэх куонкуруһу искусство оскуолатын учуутала Наталья Винокурова тэрийэн ыытта.

Наталья Винокурова конкурус туһунан кылгастык бу курдук кэпсээтэ:

- Бу долгутуулаах уонна кэтэһиилээх күрэстэһиигэ 16 оҕо кытынна. “Лесной олень”, “Три белых коня”, “Песенка о лете”, “Мы – гагаринцы”, “Темп” о.д.а. ырыалары олус үчүгэйдик толордулар. Төрөппүттэр оҕо саастарыгар эргиллэн тэҥҥэ ылластылар, ытыс тыаһын харыстаабатылар. Сынньалаҥ кэмигэр оскуола хореографияҕа кылааһын оҕолоро көрөөччүлэргэ бэртээхэй үҥкүүлэри бэлэхтээтилэр. Куонкуруска улахан болҕомто ууруллубута үөрдэр. Төрөппүттэр бэлэмнэниини көтүппэккэ оҕолорун кытта тэҥҥэ сырыттылар, таҥас-сап тиктилэр, биир тылынан түбүк бөҕөтүн көрүстүлэр.

Кырачаан ырыаһыттар бары сулус курдук чаҕылыһан көрөөччүлэри үөртүлэр. Дьүүллүүр сүбэ “Удачный дебют», «Раскрытие образа», «Выразительное выступление», «Яркая индивидуальность», «За артистизм», «За музыкальность» ааттары туттартаата. Бириистээх миэстэлэр алын, орто, улахан бөлөхтөргө ыллаабыт бастыҥтан бастыҥнарга туттарылыннылар. Оҕолор дипломнары кытта микрофон статуэткалары ылан улаханнык астыннылар.

Зырянкалар куонкуруһу тэрийээччилэргэ махталлара улахан. Оттон оҕолор ырыаны-тойугу билэллэрин сэргэ, композитордар тустарынан сэргээһиннэрэ улааппыт. Кинилэр сотору буолуохтаах норуот ырыатын күрэстэһиитигэр бэлэмнэммитинэн барыахтара.