Куонкурус бастакы түһүмэҕэр тоҕус педагог кытынна. Педагогическай маастарыстыбаларын, дьоҕурдарын көрдөрөн аһаҕас уруоктары, кылаас таһынааҕы тэрээһиннэри ыыттылар. Олор түмүктэринэн Намнааҕы оҕо искусствотын оскуолатын музыка теориятын учуутала Айталина Павлова, Хатыҥ Арыытааҕы оҕо искусствотын оскуолатын хореографическай кылааһын учуутала Татьяна Попова, Намнааҕы оҕо искусствотын оскуолатын хор кылааһын учуутала Мария Дьяконова, Партизаннааҕы филиал хореографическай кылааһын учуутала Алексей Дьячковскай уонна Намнааҕы оҕо искусствотын оскуолатын баян кылааһын учуутала Александр Шестаков финалга таҕыстылар.

Манна кыттааччылар бэйэлэрин билиһиннэрдилэр, кылаас таһынан ыыппыт уруоктарын көмүскээтилэр уонна боппуруостарга эппиэттээтилэр. Хас биирдии эдэр педагог талаанын, сатабылын, идэтигэр бэриниитин, дьоҕурун, билиитин-көрүүтүн сыаналаан дьүүллүүр сүбэ анал номинациялар кыайыылахтарын ааттаталаата. Ол курдук, Татьяна Попова - «За творческий поиск», Дьяконова Мария - «За лучший открытый урок», Айталина Павлова - «За лучшее внеклассное мероприятие», Алексей Дьячковскай - «За креативность в педагогической деятельности» номинациялар хаһаайыттарынан буоллулар. «Эдэр педагог - 2015» куонкурус кыайыылааҕынан Намнааҕы оҕо искусствотын баян кылааһын учуутала Александр Шестаков буолла. Хас биирдии кыттааччыга анал аатын туоһулуур дипломнар, бириистэр туттарылыннылар.