Эдэр учууталлар аһаҕас уруоктары, кылаас таһынааҕы тэрээһиннэри ыыттылар, бэйэлэрин бырайыактарын көмүскээтилэр. Үс түһүмэхтээх күрэстэһии кэнниттэн бастыҥнарынан Мэлдьэхси историяҕа уонна обществознаниеҕа учуутала И.И.Аргунов, В.П.Ларионов аатынан орто оскуола нуучча тылыгар, литературатыгар учуутала Ф.Ф.Белолюбскай, Балыктаах оскуолатын физкультураҕа учуутала И.Е.Мохначевскай, Матта орто оскуолатын технологияҕа учуутала Нь.П.Стручков буоллулар.

«Сыл эдэр педагога» аатын Харатааҕы орто оскуола английскай тылы үөрэтэр учуутала Николай Петров сүктэ. Кини ХИФУ тас дойдулар филологияларыгар институтун бүтэрэн, оскуолаҕа иккис сылын үлэлиир. Николай Анатольевич олунньу 27-28 күннэригэр Чурапчы улууһун Сылаҥ орто оскуолатыгар ыытыллыбыт эдэр педагогтар илин эҥэрдээҕи оройуоннар икки ардыларынааҕы IX аһаҕас общественнай күрэхтэһиилэригэр 26 кыттааччыттан чорбойон маҥнайгы миэстэни ылан, кыайыы өрөгөйүн биллэ.

«Сыл учуутала» күрэхтэһиигэ лауреаттарынан Аллараа Бэстээх 2-с №-дээх оскуолатын физкультураҕа учуутала М.П.Бурнашев, В.П.Ларионов аатынан орто оскуола историяҕа уонна обществознаниеҕа учуутала Е.Е.Семенов, Павловскай орто скуолатын технологияҕа учуутала И.Д.Степанов, Төҥүлүтээҕи орто оскуола ОБЖ предметигэр учуутала В.С.Эверстов ааттаннылар.

«Сыл учуутала ‒ 2015» ааты Майатааҕы лицей историяҕа уонна обществознаниеҕа учуутала Андрей Кычкин ылары ситистэ.