«Анаабыр уоттара» 60 сыллаах үбүлүөйүн чэрчитинэн, хаһыат ыҥырыытынан кэлбит ыалдьыттарбыт бастаан Саргылаана Сыроватская сэбиэдиссэйдээх кииннэммит библиотекаҕа сырыттылар. Саргылаана Гольдерова 80-с сылларга манна хаһыакка үлэлээбит сылларын иһирэхтик аҕынна. Поэтесса үбүлүөйүн көрсө тахсыбыт «Кэм айанньыта» диэн саҥа кинигэтин билиһиннэрдэ. Суруналыыс буолар баҕатын уһугуннарбыт, хоһоонноро суруллубут Анаабырыгар, ааҕааччыларыгар махтанна.

Оттон эмиэ айыылартан бэриллибит талааннаах Тайаана улууспутугар бу бастакы сырыыта. Ойуулуур-дьүһүннүүр искусствотын, кыптыыйын тойугун билиһиннэрдэ, маастар кылаастары ыытта, уйулҕаһыт идэтинэн олохтоохтордуун көрүстэ, алгыс иҥэрдэ.

Ыалдьыттарбыт улуустааҕы гимназияҕа, Сааскылаах орто оскуолатыгар, “Тугутчаан” оҕо саадыгар сырыттылар. Долганнар түөлбэлээн олорор Үрүҥ Хайа национальнай бөһүөлэгэр нэһилиэнньэни кытта көрүстүлэр, кыраайы үөрэтэр музейга сырыттылар. Олохтоохтор инникитин өссө да кэлэныалдьыттыылларыгар баҕа санааларын эттилэр.

Улуус баһылыгаИван Семеновтыын көрсүһүүгэ Тайаана киинтэн ыраах хоту улууска санаа тууйуллуута күүстээҕин бэлиэтээтэ итиэннэ чөл олохтоох, сэргэхтик сылдьыы кистэлэҥнэригэр бэйэтин санаатын үллэһиннэ. Айар куттаах далбар хотуттар Анаабырга сырыылара, төрүт олохтоохтор духуобунай-культурнай эйгэлэриниин алтыһыылара кинилэргэ саҥа санааны, иэйиилэри сахпытыгар саарбахтаабаппыт. Тугэнинэн туһанан ыраах хоту сиргэ кинилэр айаннарын ороскуотун уйуммут, хаһыат коллективын өйөөбүт “Анаабыр алмаастара” ААУо генеральнай директорыгар Матвей Евсеевка уонна депутаппытыгар Иван Андреевка махтал истиҥ тылларын аныыбыт.