"Өймөкөөнтөн иһэр эдэр уол" ким буоларын СИА-ҕа улуустааҕы хаһыат редактора Анна Галузо билиһиннэрэн суруйбута. Суоппар, Мэҥэ-Хаҥалас Төхтүрүттэн төрүттээх Өймөкөөн Төрүтүн олохтооҕо Антон Егоровы кытта сибээскэ тахсан бу түбэлтэ туһунан сиһилии кэпсииригэр көрдөстүбүт.

- Өймөкөөнтөн Дьокуускайга кэлээт, Чурапчыга билэр дьоммор таһаҕас илдьэн баран, куоракка төннөн испитим. Суолга биир массыына тоҥон турарын көрөн тохтообутум. Чурапчыттан айаннаан иһэллэрин, Нуораҕананы ааһаат (Төҥүлүттэн 20 км сиргэ) алдьаммыттарын кэпсээбиттэрэ. Мин иннибинэ икки массыынаны тохтото сылдьыбыттар да, анарааҥылара "Тиэтэйэ сылдьабыт" диэн, тоҥмут массыынаны сосуһарга сөбүлэспэтэхтэр. Мин эмиэ төһө да ыксыы сырыттарбын (уматыгым бүтэн эрэрэ), бу тымныыга дьону хаалларыам дуо, Нуораҕанаҕа илдьэн гаражка угаат, төннүбүтүм.

– Антон, эмискэ биллиилээх буола түһэр хайдах эбитий?

– Интернеккэ чугас дьоммун билиһиннэрэн суруйбуттарыттан соһуйдум. Онтон саамай үөрбүтүм -- эһэм, Аҕа дойду Улуу сэриитин кыттыылааҕа, Белоруссия партизана Антон Давлюд аата ааттаммытыттан. Кини сэрии кэнниттэн билиэҥҥэ түбэспит буруйугар ГУЛАГ лааҕырыгар ыытыллыбыт. Мин эһэм курдук сэрии кыттыылаахтара Өймөкөөҥҥө түбэһэн кэлэн, төһөлөөх эрэйи көрөөхтөөбүттэрэ буолуой? Дьолго, кини мин эбэбин, Төрүт олохтооҕо Евдокия Винокурованы көрсөн, оҕолонон-урууланан, дьоллоохтук олорон күн сириттэн барбыта.

-- Эн былырыын "Халыма" федеральнай суолга тоҥо сыспыт дьону эмиэ быыһаан турардаах эбиккин дии?

-- Бу түбэлтэлэргэ мин оннук улахан хорсун быһыыны оҥордум дии санаабаппын. Хас биирдии эр киһи алдьархайга түбэспит дьоҥҥо көмөлөһөрө -- кини ытык иэһэ дии саныыбын. Ким баҕарар бу массыыналара алдьаммыт дьон оннуларыгар буолуон сөп. Онон миэхэ махтаммыт дьон "айаҥҥа тохтоон турар кыһалҕалаахтарга болҕомтолоох буолуҥ" диэн ватсап нөҥүө саха дьонун сэрэппиттэригэр, төттөрүтүн, мин бэйэм кинилэргэ махтанабын. Онон тыйыс усулуобуйаҕа, бытархан тымныыга айанныы сылдьар дьон бэйэ-бэйэбитигэр уһулуччу болҕомтолоох буолуоҕуҥ.

...Быйыл сайын өҥүрүк куйаас сатыылаан турдаҕына, Хаҥаласка ыытыллыбыт Олоҥхо ыһыаҕар Өймөкөөн улууһун култуураҕа управлениетын массыынатынан барбытым. Аара суолга массыына алдьанан турарын көрөн, суоппар Николай Сивцев тохтоон дэлби сылайбыт, утаппыт мап-мааны сахалыы таҥастаах дьахталлары ыһыахтыыр түһүлгэҕэ илдьэн биэрбитэ. Онно дьахталлар: "Бэрт элбэх массыынаны тохтото сатаатыбыт да, ким да ылбата..."-- диэбиттэригэр Николай этэн турар:

-- Биһиги, Өймөкөөн суоппардара, кыһын буоллун, сайын буоллун, айаммыт олус эрэйдээх уонна кутталлаах буолан, аара алдьанан турар массыынаны хаһан да ааһа барбаппыт. Ол айанньыт суруллубатах быраабылата.

Эһигинэн киэн туттабыт, Өймөкөөн суоппардара!