Дьиҥэр, түмсүбүттэрэ, үлэлээбиттэрэ номнуо биир сыл буолбут. Бу күннэргэ Юстиция министерствотыгар общественнай тэрилтэ быһыытынан регистрацияланарга устааптарын бэлэмнээбиттэр. Кинилэр сыаллара-соруктара атыттартан уратылаах. Ол эбэтэр кинилэр Ватсап. Интернет көмөтүнэн араас бөлөхтөрү арыйан, биллэрэр-иһитиннэрэр тэрилтэ быһыытынан үлэлиир былааннаахтар. Ити оруннаах. Саха сирин ыраах улуустарыгар, нэһилиэктэригэр төһөлөөх ыарыһах киһи дьиэ түөрт эркининэн эрэ муҥурданара буолуой? Киниэхэ сыһыаннаах уларыйыылары, бэл уруккуттан баар да быраабын билбэтиттэн чэпчэтиилэринэн, ылыахтаах пособиеларынан уо.д.а. туһаммакка хаалара мэлдьэх буолбатах.

Биэс сүүсчэкэ чилиэннээх бу общественнай тэрилтэ чилиэннэрэ ый аайы мустан араас боппуруостары дьүүллэһэллэр, тугу ситиспиттэрин, тирээн турар кыһалҕалары быһаарсаллар.

Долун: «Мин саахалга түбэһэн, инбэлиит буолар дьылҕаламмытым. Сыл аҥара дьиэбиттэн тахсыбатаҕым. Ити курдук дьиэҕэ хаалан хаалар инбэлииттэр олус элбэхтэр. Мин кинилэри дьоҥҥо-сэргэҕэ таһаарыахпын, толору олоҕу билэллэригэр көмөлөһүөхпүн баҕарабын. Ватсапка, информационнай ситимҥэ (89141082278) төһө баҕарар эрийиҥ, суруйуҥ».

Маргарита Кардашевская:«Мин оҕо эрдэхпиттэн сүрэх ыарыһахпын. Син үлэлии-хамсыы сылдьыбыт киһини «сүрэҕиҥ олох мөлтөөбүт, үлэлээмэ» диэн инбэлииккэ таһааран кэбиспиттэрэ. Эдэр киһи олоҕум итинэн бүппүт, атыттартан итэҕэстээх курдук сананан, дьиэҕэ хаайтаран олорбутум. Мин курдук киһи элбэх этэ.

Инбэлииттэр обществоларыгар 26 сыл үлэлээбит үөрүйэхпин, билиибин туһанан атын дьоҥҥо туһалаах сүбэлэри-амалары биэрэн, тугунан эмэ көмөлөһүөхпүн баҕарабын. Онно туох да төлөбүргэ, хайҕалга наадыйбаппын. Сарсыарда билэр дьонум уулуссаҕа көрсөн: «Үлэҕэр баран иһэҕин дуо?» - диэтэхтэринэ, дьоҥҥо туһалыы барарым туһунан этэрбиттэн үөрэбин.

Биһиги үлэбитин, информационнай ситиммитин интэриэһиргээбит дьон «Мэһэйэ суох» форумҥа киириэххитин эмиэ сөп. Сорох киһи биһиэхэ кэлэн да баран кыбыстан, санаатын толору эппэккэ барар. Ол оннугар суругунан ирэ-хоро кэпсэтиэн, санаатын сайа этэн сайҕаныан сөп буоллаҕа».

х х х

«Государство доруобуйаларыгар хааччахтаах дьон олорор, эмтэнэр уо.д.а. усулуобуйаларын тылынан эрэ буолбакка, дьыаланан хааччыйыахтаах», – диибит. Оттон «Инбэлиит киһи туох көмөҕө наадыйарый, ханнык көмө киниэхэ ордук көдьүүстээҕий?» – диэн боппуруоска эппиэти толкуйдаан көрүөҕүҥ эрэ. Кини этин-сиинин, доруобуйатын чөлүгэр түһэриигэ эрэ буолбакка, бастататан туран, дьон киһилии сыһыаныгар, ис кыаҕын, дьоҕурун сайыннарыыга наадыйар. Кинилэргэ оҥоһуллар көмө «төттөрү реакцияҕа» көҕүлээн, обществоҕа туһаны аҕалыахтарын баҕараллар. Ол аата доруобуйатыгар хааччахтаах киһи общество киниэхэ, кини көмөтүгэр эмиэ наадыйарын билиэхтээх уонна ол көмөнү оҥорорго дьулуһуохтаах, олоххо тардыһыахтаах. Ити санааны бүгүн сэһэргэспит дьонум кэпсээннэрэ толору бигэргэттэ, кинилэр сөптөөх суолу тутуспуттарын өссө төгүл итэҕэйдим.