- Маннык бырааһынньыгы тэрийэр буолбуппут бэһис сыла. Онон оҕолор сылын аайы долгуйа күүтэллэр. Быйыл хас биирдии нэһилиэктэн биэстии-алталыы оҕо кэллэ. Уопсайа 110 оҕо ыалдьыттаата. Хас оонньуу-көр кыайыылааҕар, көхтөөх кыттааччыга, маскарааттаммыттарга барыларыгар бириистэр туттарыллан, оҕолор барахсаттар үөрүүлэрэ баһаам, - диир улуустааҕы социальнай харалта отделын начальнига Ольга Скрыбыкина.

Күүтүүлээх бырааһынньыкка мустубут оҕолору улуус баһылыга Никита Андреев эҕэрдэлээтэ, үчүгэйдик үөрэнэллэригэр, оскуола олоҕор көхтөөхтүк кытталларыгар баҕарда. Салгыы Тымныы Оҕонньор Хаарчаанатын уонна араас кыыллары-сүөллэри кытта оҕолорго остуоруйа көрдөрдүлэр, оонньуулары тэрийдилэр, таабырыннары таайтардылар. Оҕолорго бу күн киинэ театрыгар мультипликационнай киинэлэри босхо көрдөрдүлэр.

Ольга Николаевна маннык бэртээхэй бырааһынньыгы тэрийэргэ көмөлөспүт, спонсордаабыт “Саха-Азия оҕолоро” фондаҕа, «Подросток» уопсастыбаҕа, Одуну нэһилиэгин ыччатыгар, предприниматель Айсен Эверстовка, Федор Поповка (“Южнай” маҕаһыын),Светлана Лю-Фаҕа (“Любоцвет” маҕаһыын), “Эргис» атыы-эргиэн киинэ” ХЭУо, предпринимателлэр фондаларыгар, уо.д.а. махталын тиэрдэр.