Бу үгэс аҕыс сыллааҕыта саҕаламмыта. Хаһыат редакцията олохторугар ыарахатитары көрсүбүт оҕолору таах хаалларбакка, кинилэргэ аптаах түгэннэри бэлэхитииргэ быһаарыммыта. Аһымал бэлэхтэри хомуйууну редакция үүннүүр-тэһинниир, оттон итилэри дьиэлэринэн участковайдар тарҕаталлар. «Биһиги куораппытыгар сокуону кэһиинэн учуокка 714 оҕо турар, олортон 607-лэрэ уустук олохтоох ыаллар оҕолоро, - диэн кэпсээтэ СИА интервьютыгар куорат полициятын начальнига Николай Кульбертинов. - Биһиги аҕыс сыллааҕыта хаһыат редакциятын кытта бу акциянгы саҕалыырбытыгар, мин Строительнай уокурукка үлэлиирим, онно биһиги ол уокурук оҕолоругар эрэ бэлэх биэрэрбит, оттон билигин номнуо Дьокуускай куорат бары оҕолоругар бэлэхтиир кыахтанныбыт, бэлэх ахсаана элбээн иһэрэ олус үөрдэр. Бэлэхтэр бары түөрт-биэс күнүнэн түҥэтиллиэхтэрэ. Дьиэлэринэн түҥэтиигэ участковайдар киэһэ биэс-алта чаастан сылдьаллар. Биллэн турар, тута-хаба, мөҕө-этэ тиийиэхтээҕэр, бэлэхтээх ыалдьыттыы тиийэр ордук буоллаҕа дии. Бу кэмҥэ төрөппүттэри саатырдыахха сөп. Оҕолор буруйдара суох, мин итини дириҥник итэҕэйэбин. Кинилэр ыарахан олохтон, көрүүтэ-истиитэ суохтан буруйу оҥороллор эбээт».

«Якутия» хаһыат кылаабынай редактора Евгений Грибчатов этэринэн, акция бастакы сылыгар түөрт уон бэлэҕи туттарбыттар. «Биһигини кытта аҕыс сыл устата «Дети Саха-Азия» Аан дойдутааҕы оҕо фондата сырытта. Быйыл бэлэхпит ахсаана рекорднай — 1500-тэн тахса. Биһиги партнердарбыт кэккэлэрэ сылын аайы хаҥаан иһэрэ үөрдэр», - диэн бэлиэтээтэ кини.

Акция Республикатааҕы пресс-киинтэн саҕаламмыта. Бэчээт Дьиэтин бастакы бэлэхтэрин үгэс быһыытынан «Берегиня» оҕо дьиэтин иитиллээччилэрэ туттулар.