РФ үлэҕэ уонна социальнай көмүскэлгэ министрэ Максим Топилин "Российская газета" хаһыакка иһитиннэрбитинэн, саҥа уларыйыы пенсияҕа дьайыа суоҕа.

"Пенсияны баллынан ааҕыы — пенсионнай фонд техническэй үлэтэ. Пенсионердарга туох да уларыйыы тахсыа суоҕа. Тохсунньутааҕы пенсия кээмэйэ ахсынньы киэниттэн уларыйбат", - диэтэ кини.

Олунньу 1 күнүттэн пенсия кээмэйэ үрдүүр. Үрдээһин 2014 сыллааҕы инфляция кээмэйиттэн көрөн индексацияланар. Сыл түмүгүнэн төһө буоларын Росстат быһа холуйан тохсунньу 20 күнүгэр диэри ааҕыаҕа. Чопчу сыыппара ый бүтүүтэ чуолкайдык биллиэҕэ.

Сокуон быһыытынан пенсия сылга иккитэ индексацияланар. Олунньу 1 күнүгэр пенсия инфляция таһымыттан тутулуктанан үрдүүр. Иккиһин - муус устар 1 күнүттэн РПФ дохуота инфляцияттан үрдүк буоллаҕына улаатар.

Экспердэр этэллэринэн, пенсия иккис үрдээһинэ нэһиилэ тиийинэн олоруу алын кээмэйэ төһө буоларыттан, уларыйарыттан тутулуктанар. Олунньутааҕы үрдээһин кэнниттэн пенсия аһаан-таҥнан олоруу алын кээмэйигэр сөп түбэспэт буоллаҕына эбиллии пенсия фондатын дохуотуттан тутулуктаныа суоҕа.

Олунньутааҕы үрдээһиҥҥэ 112 млрд солк. наада. Ити үп федеральнай бюджеттан бэриллиэҕин туһунан вице-премьер Ольга Голодец эттэ. Эрдэ итиннэ 90 млрд солк. бэриллэр диэн этэ. Оччолорго инфляция 7,5 бырыһыанынан ааҕыллыбыта.

Пенсионнай балл туһунан этэр буоллахха, саҥа сылтан пенсионнай фонда сайтыгар страховкалаах дьон "тус кабинеттара" үлэлиэҕэ. Государственнай өҥө порталыгар киирэн төһө балл мунньуллубутун, үлэни биэрээччи төһө харчыны укпутун, билиҥҥи уонна инники пенсия, о.д.а. тустарынан дьон билэр кыахтаныаҕын туһунан Максим Топилин эттэ.