Дьокуускай олохтооҕоМария Винокурова Василий Майоров огдообото Евдокия Ефимовна этиитинэн бастайааннай бэрэстэбиитэлистибэҕэ эһэтин көрдүүрүгэр көмөлөһөллөрүгэр көрдөспүтэ. Кини эһэтэ көмүллүбүт сирин 30 сыл устатыгар көрдөөбүтэ.

Буойун көмүллүбүт сирэ тута көстүбэтэҕэ.  Василий Дмитриевич Майоров Поддорскай оройуоҥҥа Холмы дэриэбинэ анныгар олоҕо быстыбыта. 1959-1960 сэбиэскэй буойуннар уҥуохтарын Старай Русса таһыгар баар «Самбатовоҕа» көһөрбүттэрэ.

Саха сириттэн уонна Санкт-Петербургтан тиийбит делегацияны Новгород уобалаһын Поддорскай дьаһалтатын бастакы солбуйааччы Елена Панина  уонна Поддорскайдааҕы кыраайы үөрэтэр музей салайааччыта Светлана Тихонова көрүстүлэр. Елена Панина Самбатово уруккута дьон олорбут дэриэбинэтэ сэрии кэмигэр урусхалламмытын туһунан кэпсээтэ. Билигин бу история өйдөбүнньүгэ буолбут сир. Манна уопсайа 8524 киһи көмүллэн сытар. Мемориальнай 101 дуоскаҕа 50 буойун аата киирбит. Кинилэр ортолоругар Василий Майоров аата эмиэ баар. 

Буойун сиэнэ Мария Васильевна кини уҥуоҕар Өлүөхүмэ сириттэн аҕалан кутта, тыынаах сибэкки дьөрбөтүн уурда.