«АХШ уонна Европа сойууһун буруйдуур дьаһалларыгар РФ салалтата сөптөөх миэрэлэри ылла. Мин ону өйүүбүн. Россия аан дойду экономикатыгар бигэтик киирбитэ. Онон бөдөҥ бизнесменнэр бэйэлэрин бырабыыталыстыбаларын Россияны утары быһаарыыларын өйөөбөттөр. Маннык дьаһалтан кинилэр төһөнү сүтэрэллэрин, сүүйтэрэллэрин дьэҥкэтик өйдүүллэр», - диэтэ кини.

 Егор Борисов Саха сирэ Silver Bear Канада компаниятын кытта хардарыта сыһыанын холобур быһыытынан аҕалла. Бу компания 2 млрд.солк. уонна уон сыл үлэтин Мангазейскайдааҕы үрүҥ көмүс баайдаах сири геологическай чинчийиигэ уурбутун эттэ. Билигин Канада бырабыыталыстыбатын быһаарыытынан икки өрүттээх балаһыанньаҕа ыктарда.

Омук дойдуларыттан аһы аҕалыы аччааһына дойдуга, чуолаан Саха сиригэр тыа хаһаайыстыбата тэтимнээхтик сайдарыгар олугу ууруон туһунан кини эттэ.

 Икки нэдиэлэ аннараа өттүгэр РФ-ҕа тыа хаһаайыстыбатын миниистирэ Николай Федоров кэлэ сылдьан Нерюнгритааҕы көтөр фабрикатын үбүлүүр уонна кэҥэтэр туһунан быһаарыны ылбытын Егор Борисов эттэ. Оччотугар көтөр этин оҥорон таһаарыы икки бүк улаатыахтаах.

«Өрөспүүбүлүкэ көтөрү иитиини сайыннарарга тустаах дьаһаллары, миэрэлэри ылар. Онон, "Буш буута" биһиэхэ суох буолуо. Урукку өттүгэр сибиинньэ этэ тас дойдуттан кэлэр эбит буоллаҕына, маны бэйэбитигэр оҥорон таһаарыахпыт», – диэтэ Егор Афанасьевич.