Сэтинньи 23 күнүгэр суһал информация кэнниттэн наркополицейскайдар Мииринэй оройуонун эрдэ үлэһиттэр уорбалааһыннарыгар киирбит икки олохтооҕун туттулар. Уорбаланааччылары наркотигы сокуоннайа суох атыылааһын кэмигэр харыларыттан харбаатылар.

Силиэдэбэтэл быһаарбытынан, 42 саастаах наркотигы атыылааччы, эрдэ көрсүһүүгэ болдьоһон, 26 саастаах доҕоругар улахан кээмэйдээх гашиһы атыылаабыт. Итини таһынан бу киһи «АЛРОСА» авиатэрилтэтин дьуһуурунай электромонтерунан үлэлиирэ билиннэ. Нарколог икки тутуллубут дьон каннабиснай бөлөх наркотигы туттубуттарын быһаарда. Ол түмүгүнэн административнай боротокуол оҥоһулунна.

Ыйытыы хаамыытыгар гашиһы атыылаһааччы оперативниктарга кини бу киһиттэн өр кэм устата хаста да атыыласпытын кэпсээбит. Кини кэнники 10 тыһыынча солкуобайдаах наркотигын атыыласпыт. Наркоман Россия Сбербаанын Саха сирин Мииринэйдээҕи салаатын региональнай менеджерын дуоһунаһыгар үлэлиир эбит.

«Мииринэй» аэропордун дьуһуурунай энергоблогун территориятын салгыы чинчийии түмүгэр полиция үлэһиттэрэ 33 гр. тахса кистэммит уонна атыылыырга анаан бэлэмнэммит гашиһы буллулар. Ити кээмэй 100-тэн тахса биирдиилээн туттулларга тиийиэхтээх.

Тутуллубут дьоннорго холуобунай дьыала тэрилиннэ, силиэстийэ ыытыллар, диэн СР НХФС-та иһитиннэрэр.