Уус-Алдан улууһун киин бибилэтиэкэлэрин ситимин салайааччы Варвара Окоемова этэринэн, кинилэргэ улуус бюджетыттан 1 мөл. 700 солк. көрүллэр. Бу үбүнэн саҥа тахсыбыт  кинигэни атыылаһан, хаһыаттары, сурунааллары сурутан, нэһилиэктэр бибилэтиэкэлэригэр тарҕаталлар. “Кумааҕыттан электроннай көрүҥҥэ көһөр дьикти кэмҥэ олоробут, -- диэн этэр кини. – Ол да буоллар, тыа сиригэр саҥа тахсыбыт кинигэни өр сытыарбаттар. Онон дьон кинигэни, хаһыаты аахпат буолла диэн этэр тутах”.
Кинигэни тарҕатааччылар этэллэринэн, саамай атыыланар ааптардарынан Татьяна Находкина, Степан Марков, Айысхаана, Галина Нельбисова, Айталина Никифорова, Куорсуннаах, Семен Маисов буолаллар.
Көрсүһүүгэ оҕону кинигэни ааҕарга хайдах үөрэтэбит диэн эмиэ кэпсэттилэр. Оҕону кыра эрдэҕиттэн кинигэ ааҕан, остуоруйа кэпсээн кэрэхсэтиэххэ, оскуолаҕа киириэҕиттэн кылаас таһынан ааҕарын ирдиэххэ наада диэн биир түмүккэ кэллилэр. “Урут учууталлар оҕо кылаас таһынан ааҕыахтаах кинигэлэрин испииһэгин туппутунан дьиэлэри кэрийэр буолаллара. Кытаанах ирдэбил баара. Учууталлар да бэйэлэрин сайыннаралларыгар испииһэктээх буолар этилэр”, -- диэн Мэҥэ-Хаҥаластан сылдьар Егор Захаров эттэ. Оттон Татьяна Находкина улуустааҕы литературнай түмсүүлэргэ, оскуолаларга баар литературнай куруһуоктарга эмиэ болҕомто ууруллуохтаах диэтэ.
Кинигэни тарҕатааччылар кыра оҕолорго сахалыы азбукаттан саҕалаан оонньуурдаах кинигэлэри, обургу оҕолорго үөрэххэ методическай босуобуйалары, өс хоһооннорун, таабырыннар, чабырҕахтар хомуурунньуктарын, ырыанньыктары, дьахталларга араас иис, сиэлинэн, туоһунан, оҕуруонан оҥоруу кистэлэҥнэригэр үөрэтэр кинигэлэри, о.д.а. таһаарарга этии киллэрдилэр.
Оттон суруйааччылар маннык көрсүһүүнү тэрийбиттэригэр махтаннылар. “Ханнык баҕарар ааптар ааҕааччыларын кытары алтыспат, ону тэҥэ литературнай кириитикэ суох буоллаҕына, кимиэхэ-туохха анаан суруйарын да билбэт. Онон маннык көрсүһүүлэр олус наадалар”, -- диэн Айталина Никифорова билиннэ.
Кинигэни тарҕатааччылар суруйааччыларга Литература сылыгар элбэх тыыппалаах айымньылары, кэрэхсэтэр кинигэлэри, ааҕааччы билиниитин баҕардылар.