Ол гынан баран, наркотиктар уонна психотропнай веществолар сылы эргиччи аҕалыллалларын кэриэтэ. Почтанан сылы быһа, кыһын айан суолунан, сайын өрүһүнэн таһаллар. Ону сэргэ, бэйэбитигэр наркотигы күөртүүр көрдүгэннэр бааллара балаһыанньаны уустугурдар. Нам, Мэҥэ-Хаҥалас, Өлүөхүмэ уонна Хаҥалас улуустарыгар үүнэр дьиикэй көлөпүнэттэн наркотигы оҥороллор. Маннааҕы көлөпүнэ айылҕа уонна климат усулуобуйатынан сибээстээн, кыра тетрагидроканнабиноллааҕынан уратылаах. Онон сибээстээн, сүрүннээн атын регионнартан ылалларын ордороллор. Наркотиктартан каннабистаах веществоны – Уһук Илиҥҥи федеральнай регионтан, опийдааҕы Урал уонна Сибиир федеральнай уокуруктарыттан аҕалаллар.
Быраабы араҥаччылыыр уорганнар «Мак-2014» сэрэтэр операцияларын түмүгүнэн дьиикэй көлөпүнэ үүнэр 140 көрдүгэнин (84 га) булан, наркотиктаах 58,6 тонна үүнээйини суох оҥордулар. Федерация субъектарыттан уонна Кытай Народнай Өрөспүүбүлүкэтиттэн Саха сиригэр наркотиктары аҕалыы 34 ханаала сабылынна. Холуобунай дьыала тэриллэр кэмигэр былырыын 74 кг 127 гр, быйыл бастакы кыбаарталга 8 кг. 422 гр наркотик былдьанна.
Кэнники сылларга наркотигы тарҕатарга Интернет маркетинговай ситимнэрэ уонна почта өҥөлөрө «көмөлөһөллөр». Ити наркодилердар буруйу оҥорууларын бопсору улаханнык уустугурдар. Чинчийиилэр көрдөрбүттэринэн, Ykt.ru олохтоох ситимигэр наркотигы тарҕатарга анал сайтар суохтар. Оттон социальнай ситимнэргэ, блоктарга уонна араас бөлөхтөр форумнарыгар психоактивнай стимулятордары атыылаһарга биллэриилэр киирэллэр. Ону таһынан, наркодилердар омук хостинын туһаналлар.
Туох да диэбит иһин, үлэ ыытыллар. СӨ наркотигы эргитиини хонтуруоллуур федеральнай сулууспатын управлениета «Ростелекомы», «Россия почтатын», IT-компаний бөлөхтөрүн уо.д.а. кытары ыкса сибээстээхтик үлэлиир. Былырыын табах булкааһын уонна бороһуоктарын тарҕатыынан дьарыктанар 5 Интернет-сайт булуллубута. Почтанан кэлэр баһыылкаларга наркотическай веществолар баалларын-суохтарын анаан үөрэтиллибит ыт көмөтүнэн бэрэбиэркэлииллэр.
Сыл аайы наркотик састааптаах үүнээйилээх сирдэри учуокка ыларга уонна ону суох оҥорорго «МАК» суһал-сэрэтэр операция ыытыллар. Ситэриилээх былаас, быраабы араҥаччылыыр уонна олохтоох салайыныы органнарын кытта нэһилиэнньэҕэ сырдатар үлэни күүскэ ыыталлар. 110 куойкалаах уонна күҥҥэ 50 киһини приемҥа көрөр поликлиникалаах наркология диспансера тутуллара былааннанар.
-
Наркотигы тарҕатыыга 2014 с. – 580, быйылгы сыл бастакы кыбартаалыгар 154 буруй оҥоһуллубут;
-
2014 с. – 603, бу сыл бастакы кыбартаалыгар 159 холуобунай дьыала тэрилиннэ;
-
276 дьыала суукка ыытылынна;
-
Наркотигы эргитиини кытары сибээстээх буруй иһин 201 киһи сууттанна (2015 сыл бастакы кыбартаалыгар – 53 киһи).
2014 сылга:
2520 киһи – быраас анабыла суох наркотиктаах средстволары уонна психотропнай веществолары туһаммыт;
2016 киһи наркология өрөспүүбүлүкэтээҕи диспансерыгар учуокка турар;
504 киһи – УФСИН учреждениеларыгар учуокка турар;
1343 киһи – «наркотическай средстволары уонна буортулаах психотропнай веществолары туһаммыт» диэн диагнозтаах;
1177 киһи – «наркомания» диагнозтаах.
2014 сылга, бу иннинээҕи сылы кытары тэҥнээтэххэ, наркотигы туһанарынан регистрацияламмыт дьон ахсаана 15,8% аҕыйаан, 2520 киһиэхэ тэҥнэстэ. Көрдөрүү намтаабыта киһи организмыгар «синтетиканы» туһаммытын быһаарыы кыаллыбатынан быһаарыллар.
Оҥоһуллар буруй 25 бырыһыана наркотигы кытта сибээстээх. Чуолаан 18-30 саастаахтар буруйу оҥороллор.
Комментарии
Авторизация на сайте через социальные сети