Үлэ, социальнай сайдыы миниистирэ Александр Дружинин  эппитинэн, бүгүҥҥү ааҕыынан Саха сиригэр Аҕа дойду Улуу сэриитин 267 кыттыылааҕа, Ленинград блокадатыгар түбэспит 54 киһи, сэрии инбэлиитин уонна сэриигэ охтубут дьон 1202 дьиэ кэргэнэ, 9915 тыыл бэтэрээнэ олороллор.

Кэлиҥҥи биэс сылга 1301 бэтэрээни уонна сэрии кыттыылааҕын дьиэ кэргэнин чилиэнин дьиэнэн-уотунан хааччыйбыттар. Александр Дружинин уочаракка билигин да 19 киһи турарын ыйда. Сэрии бэтэрээннэрин дьиэлээһин федеральнай уонна өрөспүүбүлүкэтээҕи бюджеттартан үбүлэнэр. 2015 сылга федеральнай бюджеттан 21,6 мөл. солк. көрүллэр. Онон, 12 бэтэрээн дьиэлэниэн туһунан миниистир эттэ.

Бэтэрээҥҥэ олорор дьиэтин өрөмүөнүгэр 180-тан 325 тыһ.солк. диэри суумалаах үп көмө быһыытынан бэриллэр. 2015 сыл тохсунньу 1 күнүнээҕи туругунан 271 бэтэрээн маннык көмөнөн туһаммыт.

Сотору бэтэрээннэргэ ыксал тирээтэҕинэ суһаллык көмөнү ыҥырар кнопкалаах сотовай телефоннары түҥэтиэхтэрэ.

Саха сиригэр олохсуйбут Аҕа дойду Улуу сэриитин кыттылааҕар маннык көмө оҥоһуллар:

- сэрии бэтэрээнигэр уонна огдооботугар кыбаартал ахсын ас сыаната үрдээһинин толуйар төлөбүр (бэтэрээн ханнык түөлбэҕэ олороруттан көрөн ити төлөбүр кээмэйэ 1089 солкуобайтан 1547 солк. диэри халбаҥныыр);

– сэрии кыттыылаахтарыгар уонна инбэлииттэригэр пенсияларыгар социальнай эбии төлөбүр (1235-тан 1269 солк. диэри);

– сэрии кыттыылаахтарыгар уонна кини дьиэ кэргэнигэр коммунальнай өҥө, олорор дьиэ иһин төлөбүргэ анаан 2252 солк. (федеральнай бюджетан 1566 солк.) ый аайы бэриллэр;

– сэрии кыттыылааҕын көмүүгэ биирдэ бэриллэр пособие (4600 солк.);

1941-1945 сс. сэрии кыттыылаахтарыгар, огдооболоругар, «Житель блокадного Ленинграда» бэлиэнэн наҕараадаламмыттарга үбүнэн-харчынан маннык өйөбүл оҥоһуллар:

– кэтэх дьиэҕэ гааһы киллэриигэ 100 тыһ.солк. кээмэйдээх биир кэмнээх аадырыстаммыт материальнай көмө;

– кииннэммит ититэр тиһиккэ холбонорго анаан 125-145 тыһ.солк. кээмэйдээх биир кэмнээх көмө. Харчы кээмэйэ бэтэрээн ханна олороруттан тутулуктанан уларыйар.

Ыам ыйын 9 күнүгэр биир кэмнээх маннык төлөбүрдэри биэриэхтэрэ:

- 1941-1945 сс. Аҕа дойду Улуу сэриитин кыттыылааҕар уонна инбэлиитигэр – 20 000 солк.;
- 1941-1945 сс. Аҕа дойду Улуу сэриитин кыттыылааҕын огдооботугар уонна «Житель блокадного Ленинграда» бэлиэни ылбыттарга – 15 000 солк.;
- 1941-1945 .с. Аҕа дойду Улуу сэриитин бэтэрээнин огдооботугар – 10 000 солк.;
- тыыл бэтэрээннэригэр – 5000 солк.;
- 1936-1945 сыллааҕы төрүөх төгүрүк тулаайахтарга – 3000 солк.