Улуус 10 оскуолатыттан, Социалистическай Үлэ Геройа И.В.Волков аатынан Орто Халыма улууһун гимназиятыттан, А.Н.Созонов аатынан искусство оҕо оскуолатыттан, оҕо, ыччат спортивнай оскуолатыттан уонна оҕо-ыччат кииниттэн бастыҥ үөрэнээччилэр талыллан, Дьокуускай куоракка ыытыллар Ил Дархан харыйатыгар кыттар чиэскэ тигистилэр.Маны таһынан үөрүүлээх тэрээһиҥҥэ „Одарённые дети“ диэн бырагырааманан Эбээх орто оскуолатыттан Айсен Аргунов уонна Арҕахтаах орто оскуолатыттан Андрей Колесов кыттыыны ылыахтара.

Москва куоракка ыытыллар Кремль харыйатыгар биһиги улуустан Өлөөкө Күөлүн агро-оскуолатын 5-с кылааһын туйгун үөрэнээччитэ Нина Третьякова барыаҕа.

Оҕолору улуустааҕы үөрэх управлениетын иитэр үлэҕэ уонна эбии үөрэхтээһиҥҥэ кылаабынай специалист Любовь Алексеевна Оконешникова салайан илдьиэҕэ.

Руслан Гаврильев: „Эһиги бастыҥ үөрэнээччилэр буоларгыт быһыытынан, Ил Дархан харыйатыгар кыттар улахан чиэскэ тигистигит. Онон оскуола, нэһилиэк, куорат эрэ чиэһин буолбакка, улуус аатын ааттатар дьон буолаҕыт. Нэһилиэккит, улуускут историятын хайаан да билиэххитин наада. Кэлэн иһэр Саҥа дьылынан эҕэрдэлиибин, үөрэххитигэр ситиһиини баҕарабын“, — диэтэ уонна улуус гербэлээх өйдөбүнньүк уруучуканы кытта блокнот бэлэхтээтэ.