Саҥа дьиэҕэ киирэр аалай лиэнтэни СӨ Бырабыыталыстыбатын бэрэссэдээтэлэ Галина Данчикова, куорат баһылыга Айсен Николаев, оҕо уһуйаанын иитиллээччилэрэ Соня Агодеева уонна Дуолан Гоголев быстылар. Лиэнтэ быһыллаатын кытары оҕо уһуйаанын сэбиэдиссэйэ Надежда Ханды ыалдьыттары уонна кырачааннары үһүс этээскэ баар сырдык, киэҥ саалаҕа ыҥыртаата. Кырачааннар саҥа дьиэҕэ киирбит уонна тапталлаах уһуйааннара төрөөбүт күнүгэр кыттыһан, ыалдьыттары хоһоонунан, ырыанан көрүстүлэр.

СӨ Бырабыыталыстыбатын Бэрэссэдээтэлэ Галина Данчикова куорат бу оройуонун олохтоохторо өр сылларга күүппүт баҕа санаалара олоххо киирбитинэн: «Тутуу СӨ Бырабыыталыстыбатын уонна РФ Үөрэхтээһиҥҥэ, наукаҕа министерстволарын икки ардыларыгар түһэрсиллибит сөбүлэһиигэ олоҕуран ыытылынна. Биллэн турар, муниципалитет кыттыыта суох буолбата. Онон элбэх тэрилтэ күүһүн түмэн, үчүгэй объект тутуллубутун бэлиэтиэххэ наада. Ыраас, сырдык дьиэҕэ иитиллибит кырачааннар мантан оскуолаҕа барыахтара. Онон оскуолаҕа киириэн иннинээҕи саастаах оҕолорго объектары тутууга РФ программатын олоххо киллэрдибит. Инникитин биһиги иннибитигэр өссө улахан сорук турар. Тоҕо диэтэххэ, оҕо саадыгар уочарат улаата турар. Быйыл өссө 5 тыһыынча курдук эбии миэстэни арыйыахтаахпыт», – диэн ис сүрэҕиттэн эҕэрдэлээтэ. Оҕо уһуйаанын тутууга кыһамньылаахтык сыһыаннаспыт тутааччыларга махтанна. «Ленатранссервис» ХЭО дириэктэрин солбуйааччы Леонид Григорьевка бырабыыталыстыба Махтал суругун, оҕо саадын салалтатыгар миэбэл ыларга сертификаты туттарда.

Куорат баһылыга Айсен Николаев эҕэрдэ тылыгар бэлиэтээбитинэн, саҥа объект Галина Данчикова уонна Бырабыыталыстыба урукку бэрэссэдээтэлэ Феодосия Габышева, ону таһынан «Алмазэргиэнбаан» өйөбүллэринэн кылгас кэмҥэ тутулунна. Үп-харчы кырыымчыгын аахсыбакка туран, уһуйааны аныгы тэриллэринэн, оонньуурдарынан хааччыйарга кыһалыннылар. "Быйыл СӨ Бырабыыталыстыбатын уонна куорат дьаһалтатын кыһамньыларынан куораппытыгар оҕо уһуйааннарыгар 880 миэстэ баар буолла. Маннык элбэх миэстэни кэнники сылларга таһаара илик этибит. Эһиил 1100 миэстэҕэ тириэрдэр сорук турар", – диэн Айсен Сергеевич инники соруктары билиһиннэрдэ.

СӨ Үөрэххэ миниистирэ Федосия Габышева «Күнчээн» уһуйаан тутуллар боппуруоһа хайдах быһаарыллыбытын туһунан кылгастык билиһиннэрдэ. 2012 сыллаахха Бырабыыталыстыба отчуотун кэмигэр куорат бу уокуругун олохтоохторо оҕо уһуйаанын тутуутун туруорсубуттара. Кинилэр туруорсуулара икки эрэ сылынан олоххо киирдэ. Феодосия Габышева: «Регионнарга 5 тыһыынчаттан итэҕэһэ суох миэстэлээх оҕо уһуйааннарын тутар туһунан В.Путин уонна Егор Борисов Ыйаахха илии баттаабыттара. Онон Саха сирэ үчүгэй тэтиминэн баран иһэр. Бу саҥа объегы тутарга ыарахаттар, бииртэн биир тахса турар боппуруостар элбэх этилэр. Ол гынан баран, ол барыта кэннибитигэр хаалла», - диэн олохтоохтор үөрүүлэрин үллэһиннэ.

Тутууну иилээн-саҕалаан ыыппыт «Ленатранссервис» дириэктэрин солбуйааччы Леонид Григорьев саҥа дьиэ күлүүһүн уһуйаан сэбиэдиссэйэ Надежда Хандыга туттарар долгутуулаах түгэнэ тиийэн кэллэ. Леонид Григорьев: «Бары даҕаны куораппытыгар оҕо уһуйааныгар миэстэ тиийбэтин билэбит. Онуоха үрдүкү былааһы мөҕүттэ үөрэммиппит. Диҥэр, бастатан туран, «Куоратым, өрөспүүбүлүкэм сайдарыгар мин тугу гынным, тугу оҥорор кыахтаахпыный?» диэн бэйэбититтэн ыйытыахтаахпыт», – диэн тутааччылар ааттарыттан санаатын тириэртэ.

Леонид Григорьев эппитин курдук, куорат биир кыһалҕалаах оройуонугар, 16-с кыбаарталга тутуллубут саҥа дьиэ кырачааннары өр сылларга үөрдэ-көтүтэ эрэ турдун. Онно эрэл баар. Тоҕо диэтэххэ, оҕолор тустарыгар кыһамньы уҕараабат. «Күнчээн» дьиэтин тутууга кыттыспыт хас биирдии киһи сүрэҕин сылааһын, дууһатын ууран туран үлэлээтэ.