Сорох дьон кредит хабалатыгар киирэр хайдахтаах курдук алдьатыылааҕын туһунан этиэҕэ, дуона суох хамнастаахтар кредитинэн туһамматахтарына, сайдыбакка, биир сиргэ тэпсэҥнии туруохтарын атын итэҕэтэ сатыаҕа. Кредит наадалааҕын дуу, суоҕун дуу туһунан ити курдук тохтоло суох мөккүһүөххэ сөп.

Үрдүкү таһымҥа уонтан тахса сылы быһа ырытыллыбыт, илдьиритиллибит "Физическэй сирэйдэр моҥкурууттааһыннарын туһунан" (Закон о банкротстве физических лиц) федеральнай сокуон 2015 сыл от ыйын 1 күнүттэн ыла күүһүгэр киириэхтээҕин арааһа, үгүспүт истибит уонна билэр буолуохтаах.

Бааҥҥа 500 тыһ.солк. иэстэммит уонна ону төлүүр кыаҕа суох буолбут киһиэхэ сокуон быһаччы дьайыаҕа. Кини бастайааннай дохуоттаах эрээри, иэһин төлүүр кыаҕа суох буоллаҕына, киниэхэ үс сыл устата төлөбүргэ тохтобул бэриллиэн сөп. Ити барыта биллэн турар, суут нөҥүө быһаарыллар.

Онтон төлүүр кыаҕыттан букатын тахсыбыт киһи баайа-мала аһаҕас атыыга туруоруллар. Манна хамсаабат баайы сэргэ түүлээхтэн тигиллибит сыаналаах таҥас, күндү таастаах, көмүс киэргэл эмиэ киирэр.

Сокуоннай сааһын ситэ илик оҕо, социальнай өттүнэн көмүскэлгэ наадыйааччы иэстээх киһини кытта бииргэ олорор буоллаҕына, эппиэкэ, көрүү-харайыы, социальнай көмүскэл уорганын бэрэстэбиитэллэрэ суукка кыттар, бүтэһиктээх быһаарыыга быһаччы дьайар  бырааптаахтар.

Моҥкурууттааһын процеһыгар үп-харчы управлячющайа булгуччу баар буолуохтаах.