Бүлүү Хампатын олохтоохторо остуоруйа алыптаах дойдутугар ыалдьыттыахтара

Бүлүү улууһун Хампатыгар Саҥа дьыллааҕы тэрээһиннэр тиһиктээхтик салҕаналлар. Былырыын баччаларга манна түөлбэлэринэн остуоруйалары көрдөрүүгэ куонкурус бэртээхэйэ буолбуттаах. Быйыл сонун буоллун диэн, остуоруйалары аны тэрилтэлэринэн көрдөрөргө быһаарыммыттар. Онон бүгүн уонна сарсын олохтоохтор остуоруйа алыптаах дойдутугар ыалдьыттыахтара.

- Оскуола, нэһилиэк дьаһалтатын, оҕо саадын, балыыһа, сельпо коллективтарыгар атын кыра тэрилтэлэр кыттыһыахтара. Отут мүнүүтэлээх остуоруйа көрдөрүллүөхтээх. Бу күннэргэ кулуупка бэлэмнэнии үгэнэ. Дьүүллүүр сүбэҕэ тэрилтэлэртэн биирдии киһи киирдэ.Онон хас биирдии остуоруйа сиэрдээхтик сыаналаныаҕа, - диэн СИА корреспонденыгар библиотекарь Дария Мандарова кэпсиир.

Кини маннык ньыманан үлэлээһин дьон-сэргэ бэйэ-бэйэҕэ сыһыана тупсарыгар, ытыктабыл, өйдөһүү бөҕөргүүрүгэр көмөлөөҕүн этэр. Ол нэһилиэк сайдарыгар тирэх буолара саарбахтаммат.