Чэппиэр күн бөлөх улуус баһылыга Юрий Боярскайы, тыа хаһаайыстыбатын управлениетын начальнига Гаврил Борохины кытта Эдьээн сэлиэнньэтигэр сырытта. Манна Александр Артемьев арыаллааччыларын кытта былырыын тыа сирин сайыннарыы анал программатыгар киирсэн саҥа дьиэ туттубут Винокуровтарга, Трофимовтарга ыалдьыттаата.

Салгыы оробуочай бөлөх 2014 сыллаахха тутуллубут 50 сүөһү турар хотонугар таарыйан, «Үлэ» хаһаайыстыба салайааччыта Екатерина Атласовалыын сэһэргэстэ. Екатерина Семеновна үлэтин-хамнаһын билиһиннэрдэ, кинилэргэ болҕомто уурулларын, үүммүт сыл улууска Тыа хаһаайыстыбатын сылынан биллэриллибитин эттэ. Кэпсэтиигэ министр салаа сайдар үс хайысхатын ыйда — тыа хаһаайыстыбатын бородууксуйатын астааһын, ону батарыы, сүөһү ахсаанын элбэтии.

Сарсыныгар министерство үлэһиттэрэ Герман Трифонов, Василий Иванов салайар хаһаайыстыбаларыгар сырытта. Герман Петрович 52 сүөһүнү, ол иһигэр 36 ыанар ынаҕы кыстатан туруорар. Маны сэргэ 20 гектарга биир сыллаах оту ыһан үүннэрэр. Ханна да буоларын курдук, үлэһит илии тиийбэтэ сүрүн харгыһынан буолбут. Василий Гаврильевич правительство биэрбит гранынан туттубут саҥа 30 сүөһү турар хотонун көрдөрдө. Салгыы оробуочай бөлөх калмык ынахтара турар хотонноругар, министерство программатынан тутуллубут олорор дьиэлэргэ, агро-оскуолаҕа сырытта. Манна Александр Еремеевич агро-оскуоланы бүтэрээччилэр тыа хаһаайыстыбатын идэтин баһылаабыттарын туоһулуур сибидиэтэлистибэлээх буолуохтаахтарын туһунан санаатын эттэ.

Ити күн буолбут «төгүрүк остуолга» улууска тыа хаһаайыстыбатын сайыннарыы кэскилин кэпсэттилэр. Улуус баһылыга Юрий Бояркин салааны сайыннарыы үлэтин билиһиннэрдэ, Уус-Маайа улууһугар Тыа хаһаайыстыбатын сыла саҕаламмытын биллэрдэ. Управление начальнига Гаврил Борохин бородууксуйаны соҕотуопкалааһын түмүгүн, 2015 сыллааҕы үлэ былаанын билиһиннэрдэ. ФКУ начальнига Матрена Абрамова улуус бюджетыттан тыа хаһаайыстыбатын үбүлээһин бииртэн уон мөлүйөҥҥэ диэри улааппытын иһитиннэрдэ.

Александр Артемьев салаа тутулун билиһиннэрдэ, сокуоҥҥа киирбит уларыйыылар туһунан кэпсээтэ, улууска тыа хаһаайыстыбатын сайыннарыы сөптөөх хайысханан ыытылларын бэлиэтээтэ. Министр мунньах кыттыылаахтарыгар махтанна, оройуон сайдар кэскиллээҕин, манна улахан кыахтар баалларын, уонна, сүрүнэ, үлэлиир баҕа баарын ыйда.