Россия президенэ Владимир Путин быыбар бюллетенигэр «барыларын утарабын» диэн графаны киллэрэр сокуоҥҥа илии баттаата. Ол эрээри, ити муниципальнай эрэ быыбардарга туттуллуоҕа.

Манна даҕатан эттэххэ, быыбар бюллетенигэр маннык графа 1991 сылтан ыла баар буолбута уонна 2006 сыллаахха суох оҥоһуллубута.

Федарция Сэбиэтин бэрэссэдээтэлэ Валентина Матвиенко салайааччылаах сенатордар бөлөхтөрө бу сокуону былырыын алтынньыга көҕүлээбитэ.

«Быыбар бюллетенигэр „барыларын утарабын“ диэн графа баар буолуута киһи Констиуциянан мэктиэлэнэр талар быраабын толору туһанарыгар кыаҕы үөскэтэр»,— диэн сокуон баһыырыы суругар этиллэр.

Сокуон бастакы барыйааныгар маннык графа президент быыбарыттан ураты быыбар бары таһымыгар киирэр диэн этэ. Кэлин уларытыллан 2015 сылтан муниципальнай быыбардарга туттуллар диэн буолла. Сокуону оҥорооччулар этэллэринэн, бу сокуон олоххо киириитэ дьон олохтоох быыбарга көхтөөхтүк кыттарын хааччыйыаҕа.