«Российскай Федерация гражданнара ону сэргэ олохтоох бэйэни салайыныы уорганнарыгар быыбарга быһаччы кандидаттары барыларын утары (кандидаттар испииһэктэрин барытын утары) куоластыахтарын сөп» диэн муниципальнай быыбар туһунан сокуон көннөрүллүбүт редакциятыгар этиллэр. Манан Саха сирин парламентарийдара өрөспүүбүлүкэ сокуонун федеральнайга сөп түбэһиннэриэхтэрэ.

Парламент вице-спикерэ Виктор Губарев «барыларын утарабын» графа үгүс быыбардааччылар көрдөһүүлэринэн төннөр диэн бэлиэтээтэ: «Бу графа уһун кэмҥэ быыбар бюллетенигэр баара, онтон кэккэ биричиинэнэн ылыллыбыта. Ону төнүннэрии гражданнар быыбардарга актыыбынайдык кытталларын көҕүлүө».

Ил Түмэн бэрэссэдээтэлэ Александр Жирков бу көннөрүү араас санааны үөскэтэр, онон общественнай холбоһуктар, гражданнар кыттыылаах кэпсэтиини ыытар наадатын эттэ.

Бу сайын Владимир Путин муниципальнай быыбардарга «барыларын утарабын» графаны төнүннэрэр туһунан сокуоҥҥа илии баттаабыта. Докумуон Госдумаҕа былырыын алтынньы ыйга Валентина Матвиенко салайааччылаах сенатордар көҕүлүүр бөлөхтөрүнэн киллэриллибитэ. Федерация Сэбиэтэ бастаан утаа «барыларын утарабын» графаны регионнааҕыттан саҕалаан федеральнайга тиийэ, Россия президенин быыбарыттан ураты, бары таһымнаах быыбардарга киллэрэр санаалааҕа. Ол эрээри ону Госдума муниципальнай таһымҥа эрэ хаалларбыта.

Маны сэргэ киллэриллибит көннөрүүлэринэн, «барыларын утарабын» кандидат дьиҥнээх кандидаттааҕар элбэх куолаһы ыллаҕына, ол эбэтэр бэйэтин уокуругар элбэх куолаһы ылбыт кандидат көрдөрүүтүн барыларын утары куоластаабыт быыбардааччы ахсаана куоһарар буоллаҕына, муниципальнай быыбар буолбатаҕынан ааҕыллар.