“Сыл бастыҥ бэтэрээнэ” — бу номинация хаһаайкатынан улуус ытык кырдьаҕаһа, сыл саҥатыгар 100 сааһын сүһүөҕүн үрдүгэр көрсүбүт Мария Петровна Кокорина буолла. Маны таһынан киниэхэ Саха Республикатын “Үйэ саас” бэлиэтэ туттарылынна.

“Тыа хаһаайыстыбатын бастыҥ специалиһа” номинация кыайыылааҕынан Алаһыай нэһилиэгин дьаһалтатын тыа хаһаайыстыбатын специалиһа Евдокия Васильевна Кондакова ааттанна.

“Бастыҥ булчутунан” Өлөөкө Күөллээҕи сылгы собуотун үлэһитэ, ааспыт сыл сур бөрөнү суоллаан бултаспыт сонордьут Максим Егорович Винокуров билиниллиннэ.

“Бастыҥ бааһынай хаһаайыстыба салайааччыта” ааты Ойуһардаахтан Иннокентий Афанасьевич Носов ылыан ылла.

“Тыа хаһаайыстыбатын бастыҥ тэрилтэтэ” номинация кыайыылааҕынан “Амтан” кооператив  (салайааччы М.И.Явловскай) буолла.

“Сыл бастыҥ механизатора” аакка Байды нэһилиэгин олохтооҕо Илья Гаврильевич Кутуков тигистэ.

“Бастыҥ оҕо үлэ, сынньалаҥ лааҕыра” номинация кыайыылааҕынан Ойуһардаах орто оскуолатын сайыҥҥы лааҕыра (салайааччы П.Е.Шкулёв) ааттанна.

“Бастыҥ педагог” үрдүк ааты Орто Халыма орто оскуолатын алын кылааһын учуутала Мария Иннокентьевна Максимова ылары ситистэ.

“Доруобуйа харыстабылын бастыҥ үлэһитэ” номинация кыайыылааҕынан киин балыыһа терапевт бырааһа Нелли Сергеевна Молодых буолла.

“Сыл бастыҥ спорстмена” ааты Сылгы Ыытартан Александра Ивановна Оконешникова ылла.

“Бастыҥ музыкальнай салайааччынан” Орто Халыматааҕы Оҕо искусствотын оскуолатын преподавателэ Татьяна Васильевна Кузьменко буолла.

“Бастыҥ библиотекарь” номинация кыайыылааҕынан Ойуһардаахтан Жанна Николаевна Тарасова ааттанна.

“Сыл бастыҥ корреспондена” аат Өлөөкө Күөлтэн Василий Спиридонович Бубякиҥҥа иҥэрилиннэ.

“Сыл бастыҥ айар коллектива”номинация Орто Халыма норуодунай театрыгар (режиссёр О.А.Винокурова) ананна.

“Сыл бастыҥ урбаанньытынан”Олег Владимирович Гапоновка буолла.

“Сыл бастыҥ салайааччыта” номинация нефтебаза дириэктэригэр Владимир Николаевич Шаборшиҥҥа туттарылынна.

“Производственнай салаа бастыҥ үлэһитэ” аат Сыбаатайдааҕы ОДьКХ тэрилтэтин маастара Пётр Петрович Колесовка иҥэрилиннэ.

“Бастыҥ баһылыгынан” Хатыҥнаах нэһилиэгин баһылыга Пётр Петрович Сибиряковка ааттанна.

Бу курдук бары салааҕа бастыҥнар быһаарылыннылар. Кинилэргэ бу ситиһиинэн тохтоон хаалбакка, төттөрүтүн, бу мантан кынаттанан салгыы улууспут чэчирии сайдарыгар бэйэлэрин кылааттарын киллэрсэ туралларыгар баҕарыаҕыҥ!

Улуус баһылыгын граннарын сэргэ атын наҕараадалар эмиэ туттарылыннылар. Ааспыт сыл “Айылҕа уонна мин” республикатааҕы акция чэрчитинэн улууска экологияҕа үлэлэһэр бастыҥ үлэһиттэргэ куонкурус биллэриллибитэ. Манна уопсайа 14 үлэ киирбититтэн, анал хамыыһыйа быһаарыытынан, 4 номинацияҕа кыайыылаахтар билиннилэр. Ол курдук, “Бастыҥ иитээччи-экологынан” Орто Халыма куорат “Саһарҕа” оҕо саадын иитээччитэ Евдокия Петровна Попова,“Бастыҥ учуутал-экологынан” Валериана Васильевна Бандерова, Налискай орто оскуолатын учуутала, “Бастыҥ энтузиаст-экологынан” Алаһыай нэһилиэгиттэн “Ыллык” оҕо-экологическай лааҕырын салайааччылара Прасковья Егоровна, Николай Петрович Стручковтар уонна “Бастыҥ библиотекарь-экологынан” улуустааҕы кииннэммит библиотека үлэһитэ Галина Георгиевна Борисова ааттаннылар.

Салгыы куорат дьаһалтатын баһылыга Варвара Оконешникова ааспыт сыл түмүгүнэн “Орто Халыма куорат бочуоттаах олохтооҕо” ааты 100 сааһын туолбут Мария Петровна Кокоринаҕа уонна Никита Гаврилович Винокуровка туттарда.

Улуус баһылыга Евгений Слепцов“Орто Халыма улууһун сайдыытыгар кылаатын иһин” бэлиэни үс улахан нэһилиэк баһылыгар: Иннокентий Дмитриевич Колесовка (Сыбаатай), Николай Константинович Винокуровка (Өлөөкө Күөл), Николай Иванович Тарасовка (Ойуһардаах) туттарда.

“Саха Республикатын тыатын хаһаайыстыбатын туйгуна” бэлиэнэн тыа хаһаайыстыбатын улуустааҕы управлениетын кылаабынай специалиһа Мария Александровна Шарина уонна Сиэн Күөл нэһилиэгин баһылыга Николай Иванович Тарасов наҕараадаланнылар.

Бэтэрээннэр улуустааҕы сэбиэттэрин бэрэссэдээтэлэ Анна Волкова “Сыл бэтэрээнэ” номинацияны Байды нэһилиэгин бэтэрээнэ, историяны үйэтитиигэ, айылҕа харыстабылыгар улахан өҥөлөөх Николай Михайлович Слепцовка үөрүүлээх быһыыга-майгыга туттарда.

Онтон тэрээһин саамай долгутуулаах түгэнэ — Сыл бэлиэтин туттарсыы буолла. Култуура сылын бэлиэтин үүммүт Урбаанньыттар сылларыгар туттарылынна. Маныаха култуура эйгэтин үлэһиттэрэ уонна урбаанньыттара сценаҕа тахсан илииттэн илиигэ чороону ыытыстылар, бу дьоро киэһэни уруйунан-айхалынан түмүктээтилэр.

Бу курдук Орто Халымаҕа дьон сүргэтин көтөҕөр ураты истиҥ киэһэ буолан ааста.