Киэҥ ыҥырыылаах мунньахха Ил Түмэн сис кэмитиэтин председателэ Василий Местников, киин куорат Думатын председателэ, “Олохтоох салайыныы Бүтүн Россиятааҕы Сэбиэтэ” Бүтүн Россиятааҕы общественнай тэрилтэ Саха сиринээҕи региональнай салаатын салайааччыта Александр Саввинов, “Олохтоох салайыныы Бүтүн Россиятааҕы Сэбиэтэ” Бүтүн Россиятааҕы общественнай тэрилтэ Саха сиринээҕи региональнай салаатын Киин сэбиэтин чилиэнэ, республика айылҕа харыстабылыгар министрэ Сахамин Афанасьев, улуус мунньаҕын председателлэрэ, Муниципальнай тэриллиилэр олохтоох салайыныыларын бэрэстэбиитэллээх уорганнарын ассоциациятын чилиэннэрэ кытыннылар.

Региональнай салаа 2014 сылга ыыппыт үлэтин түмүгүн туһунан Александр Саввинов иһитиннэриитин дьүүллэстилэр.

Александр Саввинов иһитиннэрбитинэн, бу общественнай тэрилтэ региональнай салаатын олохтоох салаалара 34 улууска үлэлииллэр. Ити салаалары улуус мунньаҕын 29 председателлэрэ, 3 баһылыгы солбуйааччы, 1 улуус сэбиэтин депутата, 1 муниципальнай оройуон киинэ - куорат баһылыга салайаллар. Отчуоттан көстөрүнэн, олохтоох салайыныы Саха сиринээҕи региональнай салаата ааспыт сыл устатыгар араас өрүттээх үлэни ыыппыт. Ол курдук, дойду олохтоох салайыныытын Саха сиринээҕи региональнай салаатын итиэннэ туһааннаах ассоциация чилиэннэрэ республикаҕа олохтоох салайыныы боппуруостарын дьүүллэһэр араас таһымнаах мунньахтары, “төгүрүк остуоллары”, семинардары, конференциялары сэргэ Россия куораттарыгар Москваҕа, Элистаҕа, Магнитогорскайга ыытыллыбыт олохтоох салайыныы тирээн турар суолталаах проблемаларын дьүүллэһиилэргэ, ааспыт күһүн ыытыллыбыт быыбардарга, олохтоох салайыныы Бүтүн Россиятааҕы Сэбиэтин V съеһигэр кыттыбыттара. Отчуокка этиллэринэн, муус устарга Ил Түмэн 20 сылынан ыытыллыбыт улахан тэрээһиннэр кэмнэригэр муниципальнай тэриллиилэр баһылыктарын быһаччы куоластаан быыбардааһын боппуруоһуттан саҕалаан, “куорат иһинээҕи оройуон” диэн муниципальнай тэриллиилэр саҥа тииптэрин уо.д.а. тустарынан киирбит этиилэри Федерация Сэбиэтин федеративнай тутулга, региональнай политикаҕа, олохтоох салайыныыга уонна хотугу сир дьыалаларыгар кэмитиэтин председателэ Степан Киричук этиитинэн Государственнай Дума туһааннаах кэмитиэтигэр ыыппыттар.

Александр Саввинов региональнай салаа улуустардааҕы олохтоох салаалара дьыалабыай эрэ өттүнэн буолбакка, спортивнай, культурнай өттүнэн эмиэ көхтөөхтүк алтыһаллара уопсай үлэҕэ үчүгэй өттүнэн дьайарын бэлиэтээтэ. Сыл ахсын ыытыллар спартакиада үгэскэ кубулуйбут күүтүүлээх түһүлгэнэн буолан, быйыл эмиэ төрдүс төгүлүн ыытыллаары турар. Дьүүллэһии кэнниттэн ассоциация чилиэннэрэ ааспыт сыллааҕы үлэни сөптөөҕүнэн сыаналаан куоластаатылар.

Мунньахха Амма, Анаабыр, Бүлүү, Ньурба, Горнай, Эдьигээн, Ленскэй, Мэҥэ-Хаҥалас, Нерюнгри, Өлөөн, Таатта, Уус-Алдан улуустарын олохтоох салааларын көхтөөх үлэлэрэ бэлиэтэннэ.

Салгыы мунньах кыттыылаахтара Саха сиринээҕи региональнай салаа 2015 сыллааҕы үлэтин былаанын бигэргэттилэр. Манна Мэҥэ-Хаҥалас улууһун депутаттарын Сэбиэтин председателэ Андрей Находкин нэһилиэктэр таһымнарыгар бастакы сүһүөх тэрилтэлэри тэрийэргэ, олохтоох салаалар үлэлэригэр баһылыктары кытыннарар тоҕоостооҕун туһунан этии киллэриитэ өйөннө. Үөһээ Халыма улууһун депутаттарын Сэбиэтэ уонна Бүлүү куоратын депутаттарын Сэбиэтэ Саха Республикатын Муниципальнай тэриллиилэрин олохтоох салайыныыларын бэрэстэбиитэллээх уорганнарын ассоциациятын саҥа чилиэнэ буоллулар.

Бүтэһигинэн киирбит араас боппуруостар ортолоругар мунньах кыттыылаахтара бу сылга ыытыллыахтаах муниципальнай тэриллиилэр олохтоох салайыныыларын бэрэстэбиитэллээх уорганнарын депутаттарын уочараттаах IV спартакиадаларын, “Бастыҥ олохтоох салаа” куонкурус балаһыанньаларын, онтон да атын тэрээһин боппуруостарынан быһаарыылары ылыннылар.