«Павловскай уонна Хаптаҕай нэһилиэктэрин икки ардыгар газохимическэй собуот тутуллуутун боппуруоһа күөрэйэн таҕыста. Экологическай экспертиза ыытыллыан иннинэ бастаан нэһилиэнньэҕэ тахсаннар билиһиннэриэхтээх, иһитиннэриэхтээх этилэр. Нэһилиэнньэни уонна общественнай түмсүүлэри хайдах кытыннарабыт диэн билигин сүбэлэһэн баран толкуйдуохтаахпыт. Биһиги билигин собуот тутуллуутун туһунан бырайыак торумун, ким сакаасчыт буоларын, тутуллуохтаах тутуу инникитин тулалыыр эйгэҕэ хайдах дьайыахтааҕын да билбэккэ олоробут. Специалистартан ыйыталаһан көрдөххө, бу собуокка производство быһыытынан метанол, карбомид уонна үһүс салаанан полимер оҥоһуллан тахсыахтаах эбит. Метанол мас испиирэ дэнэр эбит, бу олус дьааттаах убаҕас, бэрт кыра да бырыһыана киһини өлөрөр сүмэһиннээх, онон дьааттаах производствонан ааттанар. Биһиги улууспутугар гаас ситимэ аттыбытыгар, тимир суол атахтаһа сытарынан ороскуоттарын аччатаары итинник дьаһанарга соруннулар», ‒ диэн мустубут дьоҥҥо улуус общественнай сэбиэтин бэрэссэдээтэлэ Рудольф Михайлов билиһиннэрдэ.

Оройуон баһылыгын бастакы солбуйааччы Павел Сазонов: «2009 с. Павловскайга Восточнай-газохимическэй хампаанньа диэн тэрилтэттэн собуоту тутуохпут этэ диэн эмиэ кэлэ сылдьыбыттара, ону нэһилиэнньэни кытта көрсүһүүгэ утараммыт тохтоппуппут. Айылҕабыт ол собуот таһаарар тобохторуттан сүһүрэр кутталлаах. Билигин эмиэ тутабыт диэн этэр газохимическэй собуоттара кэпсэтиһиигэ эрэ сылдьар, ханнык тэрилтэ тутуохтааҕа, үлэлэтиэхтээҕэ куонкурус быһыытынан таһаарылла илик. Биһиги эрэ интэриэспит буолбакка, бүттүүн Саха Республикатын интэриэһэ буолуохтаах, онон бу боппуруос нэһилиэнньэҕэ хайаан да аһаҕастык иһитиннэриллиэхтээх», ‒ диэн эттэ.

Кэпсэтиһиигэ элбэх киһи тыл этэн санаатын үллэһиннэ. Дьокуускайтан Иван Шамаев, Георгий Артемьев, Ирина Пак, Нина Герасимова, Павловскай, Хаптаҕай нэһилиэктэрин олохтоохторо кытыннылар.

Павловскайтан Людмила Оконешникова: «Ити собуота да суох тулалыыр айылҕабыт күөрэ-лаҥкы буолла. Тимир суолу тутууну ыытаары төһөлөөх сири-уоту алдьаппыттарын ааҕан сиппэккин, билигин да ити хамсааһыны сэргээбэппит. Гаас ситимэ өрүһү туоратыллан тардыллыбыта үчүгэй эрээри, өрүс сүнньэ уларыйда, оттуур ходуһабыт ууга ылларда. Тыа сирэ олохпут-дьаһахпыт туллар тутааҕа буоларын умнумуоҕуҥ. Газохимическэй собуот тутулларын бүттүүн нэһилиэгинэн утарарбытын биллэрэбит, ол оннугар тыа хаһаайыстыбата сайдыытыгар үгүөрү үбү-харчыны угуоҕуҥ».

Оройуон депутаттарын Сэбиэтин бэрэссэдээтэлэ Андрей Находкин улууспут эрэ нэһилиэнньэтэ буолбакка, бүттүүн илин эҥэр улуустарга, Дьокуускай олохтоохторун санаалара хайаан учуоттаныллыахтааҕын, нэһилиэнньэ төһө буортуну аҕалар тутуу саҕаланан эрэрин бүүс-бүтүннүү билиэхтээҕин эттэ. Улууска саҥа тэрилтэттэн нолуок киириитэ үчүгэй буолуох этэ эрээри, тулалыыр эйгэ харыстабылын боппуруоһа сытыытык турарын чорботон бэлиэтээтэ.

Салгыы тыл эппит дьон газохимическэй собуот буортулаах дьайыыта хас эмэ уонунан сыллары нөҥүөлээн кэнэҕэски ыччакка куһаҕаннык дьайыаҕын, ыарыы-сүтүү элбиэҕин туһунан этэн-тыынан туран дьаарханалларын биллэрдилэр. Номнуо бырайыактана охсубут собуоту тутаары кэлэр түгэннэригэр бүттүүн общественноһынан көҕүлүүр бөлөҕү тэрийэн киэҥ кэпсэтиһиини тэрийэргэ быһаарыннылар.

Кэпсэтиһии түмүгэр көҕүлүүр бөлөх тэрилиннэ. Бөлөххө Хаптаҕайтан Роман Федоров, Николай Попов, Дмитрий Егоров, Валерий Никифоров, Нөөрүктээйиттэн Сардаана Попова, Ирина Пак, Николай Яковлев, Людмила Оконешникова, оройуон депутаттарын Сэбиэтиттэн Прокопий Марков, Прокопий Тарабукин, общественнай түмсүүлэртэн Рудольф Михайлов, Евдокия Решетникова, Анатолий Егоров, Анна Сергеева, Роман Попов бэйэлэрин баҕаларынан киирдилэр.

Салгыы улууспутугар газохимическэй собуот тутуллуутун утарар соруктаах нэһилиэктэргэ, Дьокуускайга киэҥ кэпсэтиһиини тэрийэр соруктаннылар.