Кэпсэтии кыттыылаахтара химическэй собуоту тутууну утаралларын эттилэр

Муус устар 1 күнүгэр Бырабыыталыстыба 2 №-дээх дьиэтигэр Саха Республикатын Общественнай палатата Мэҥэ-Хаҥаласка тутуллара былааннанар химическэй собуот бырайыагын дьүүллэстэ. «Төгүрүк остуол» тула кэпсэтиигэ общественнай тэрилтэлэр, «Ростех» корпарация уонна Индия «Глобал Стил Холдинг Лтд» компаниятын бэрэстэбиитэллэрэ кыттыыны ыллылар.


СР экономикаҕа миниистирэ Владимир Максимов химическэй собуоту тутуу туһунан Общественнай палатаҕа бу бастакы улахан кэпсэтии буоларын, сүдү бырайыак олоххо киирдэҕинэ туһата сөҕүмэр буолуохтааҕын, ону олохтоох нэһилиэнньэ билиэхтээҕин бэлиэтээн эттэ.
«РТ-Глобальные ресурсы» ХЭУо генеральнай дириэктэрин солбуйааччы Игорь Демидов аныгы бырайыагынан тутуллар химическэй собуот экологияҕа куттала суоҕун, ону билигин аан дойдуга үлэлии турар собуоттар бигэргэтэллэрин, олохтоохтор ону билбэт буолан, сыыһа өйдөбүлгэ олоҕуран, улахан барыһы аҕалыахтаах бырайыагы туора сото сатыылларын туһунан эттэ.
Оттон «Глобал Стил Холдинг Лтд» компания вице-президенэ Балендеры Кумар эмиэ аныгы химическэй собуот тулалыыр эйгэҕэ куттала суоҕун, Саха Республиката сайдарыгар улахан туһалааҕын, барыстааҕын туһунан быһааран кэпсээтэ, уопсай өйдөбүлү биэрэ сатаата.
Ол эрээри Мэҥэ-Хаҥаласка тутуллуохтаах химическэй собуот Саха сирин тулалыыр эйгэтигэр сөҕүмэр киртийиини, куһаҕан дьайыыны оҥоруо диэн дьиксинэллэрин туһунан Иван Шамаев, Дмитрий Вольнов, Евдокия Михайлова эттилэр, сытыы боппуруостары биэрдилэр. Ити кэнниттэн тигээйи уйата тоҕо тардыллыбытыныы тыл этээччилэр химическэй собуот тутулларын утаралларын, атын сиргэ көһөрөллөрүгэр модьуйалларын уонна ону ситиһэргэ бырачыас араас көрүҥүн барытын туттарга бэлэмнэрин эттилэр.