Кини дойдутун кэрэ айылҕатын, үлэһит дьонун хоһооҥҥо хоһуйбут, ырыаҕа ыллаппыт бастакы поэппыт буолар. Улууспут өрөгөйүн ырыата Кэбээйигэ эрэ буолбакка өрөспүүбүлүкэҕэ биллэр, ылланар буолбутугар Иван Романович төрөөбүт дойдутун ырыаһыта быһыытынан аата аттаныан ааттанар.

Бу күннэргэ Иван Петровка аналлаах тэрээһиннэр оскуолабытыгар дириҥ ис хоһоонноохтук, иэйиилээхтик ыччакка төрөөбүт дойдуга тапталы иҥэрэр тыыннаахтык аастылар.

Оскуола үөрэнээччилэригэр ыытыллыбыт «төгүрүк остуолга” поэт Иван Петров олоҕун, дьылҕатын туһунан, айымньыларынан дакылааттары аахтылар. Итини таһынан оҕолор чинчийэр үлэлэрин түмүгүнэн ааҕыылары иһитиннэрдилэр. Ол курдук «Поэт үөрэппит ыччаттара», «Поэт Сииттэтээҕи аймахтара» уо.д.а.тиэмэлэринэн оскуола иһинэн үлэлиир «Ситим» кыраайы үөрэтэр куруһуок оҕолоро (салайааччы А.Л. Сивцева) бэрт интэриэһинэй үлэлэрин билиһиннэрдилэр.

Алын кылаас үөрэнээччилэрэ Иван Петров хоһооннорун аахтылар, ырыаларын ыллаатылар, поэт айымньыларынан уруһуйдарын көмүскээтилэр. «Кэбээйи» диэн ырыа буолбут хоһоонун 2-с кылаас үөрэнээччилэрэ (салайааччы У.В. Петрова) нууччалыы тылбаастаан ыллаатылар.

Кылаас салайааччылара,учууталлар кинигэ быыстапкаларын тэрийдилэр, бэсиэдэлэри, кылаас чаастарын ыыттылар.

«Кэбээйибит бастакы учуутала, ырыаһыта» диэн “төгүрүк остуолга» тэрилтэ салайааччылара, оҕо саадын иитээччилэрэ, учууталлар тиэмэлэринэн ааҕыыга кытыннылар. Тэрээһиҥҥэ Иван Романович үөрэппит ыччаттарыттан ыал ийэлэрэ, эбээлэрэ Анастасия Петрова, Ольга Попова учууталларын туһунан истиҥ-иһирэх тылларынан санаан-ахтан аастылар. Поэт “Ньургуһун” диэн ырыа буолбут хоһоонун Василий Степанов ыллаан биэчэри киэргэттэ.

Тэрээһини олохтоох библиотека үлэһитэ Мария Обутова иилээн-саҕалаан ыытта уонна кыттааччыларга барыларыгар сертификаттары туттарда.