Бу айар киэһэтигэр Хотун Арылы сахалартан опера бастакы профессиональнай режиссера, «Ньургун Боотур» операҕа Туйаарыма Куо оруолун бастакынан ситиһиилээхтик толорбут Анна Егорова кыайыыга кынаттаабыт ырыаларын, оттон телевидение ыытааччыта Олег Колесов-Талбан буойун-поэт Макар Хара окуопаҕа сытан суруйбут буорах сыттаах хоһооннорун аахта.

Макар Хара уонна Анна Егорова иккиэн Таатта улууһун Уолбатыгар 1915 сыллаахха төрөөбүттэрэ. 1940 сыллаахха Воронеж куоракка холбоспуттара. Макар Хара оччолорго Москваҕа суруналыыстыка институтугар үөрэнэрэ. Оттон Анна Егорова ол дьыл Воронёжка музыкальнай училищеҕа уһуйулла кэлбитэ. 1941 сыллаахха сэрии буолан, иккиэн үөрэхтэрин ситэ бүтэрбэккэ, Макар Иванович аармыйаҕа бастакы хомуурга ыҥырыллан барар, Анна Ивановна дойдутугар Дьокуускайга төннөр. Кини саллаат кэргэнин 4 сылы быһа бэриниилээхтик кэтэһэр. Оттон хорсун буойун кинини эрэнэ күүтэр тапталлаах кэргэнэ баар буолан, кырыктаах кыргыһыыттан тыыннаах ордон, Кыһыл Сулус орденнаах, хас да бойобуой мэтээллээх этэҥҥэ эргиллэн кэлэр.

Кинилэр сэриини кыайбыт нарын тапталларын Хотун Арылы уонна кини доҕотторо Дмитрий Барабанов, Сергей Максимов, Константин Степанов, Николай Исак ырыанан-хоһоонунан дьүһүйэн, истиҥ иэйиилээхтик оонньоотулар. Дьоро киэһэни тыыннаах доҕуһуолунан Николай Стручков, Иннокентий Готовцев, Анна Томская,  үҥкүүнэн «Бриллианты Якутии» (сал. Афанасий, Зоя Соловьевтар), ансаамбыл оҕолоро киэргэттилэр. Туруорааччы – поэтесса Елена Слепцова-Куорсуннаах.

Саха искусствотын, культуратын сайдыытыгар сүҥкэн кылааттаах Анна Ивановна Егорова, саха литературатыгар Аҕа дойду Улуу сэрии тиэмэтин биир бастакынан киллэрбит, кыргыһыы хааннаах толоонуттан 70-ча хоһоону суруйан ыыппыт буойун-поэт Макар Иванович Кузьмин айар үлэлэригэр сүгүрүйэн, кинилэр сырдык ааттарын үйэтитэн, саха бастыҥ куоластаах ырыаһыта Хотун Арылы бэртээхэй тэрээһини толкуйдаан, бар дьонугар бэлэх ууммута кэрэхсэбиллээх уонна махталлаах.