Оҕолоругар, сиэннэригэр ыалдьа үгүс киһи кэлбит. Уолаттар бииргэ үөрэнэр оҕолорун, чугас доҕотторун түһэн биэрбэт курдук туһуннулар. Ол быыһыгар кыһыылаахтык хотторон, харахтарыгар уу-хаар баспыттар кытта бааллара.

Күрэхтэһии кылаабынай судьуйата Анатолий Петров СИА корреспонденыгар бу курдук кэпсээтэ:

- Манна Өктөм лицейиттэн, Ой, Уулаах Аан, I Дьөппөн, Хачыкаат оскуолаларыттан кэлэн күрэхтэстилэр. Уопсайа 100-тэн тахса оҕо, ол иһигэр өрөспүүбүлүкэ хас да төгүллээх чемпионнара Данил Иванов, Петя Адамов, Эмир Дуйшекеев кытыннылар. Бу соторутааҕыта буолан ааспыт өрөспүүбүлүкэ күрэхтэһиитигэр кинилэр олус наадалаах очукуолары биэрэннэр, Хаҥалас улууһун хамаандата өрөспүүбүлүкэҕэ иккис миэстэ буолбута.

Хапсаҕайга муҥутуур кыайыылааҕы быһаарар хапсыһыылар саастарынан бөлөхтөрүнэн ыытылынна. Манна, 2001-2002 сыллаах төрүөхтэргэ Алик Пастухов (Хачыкаат), 2003-2004 с.т. - Захаров Вова (Покровскай 1 №-дээх орто оскуола) уонна 2005-2006 с.т. - Кононов Арсен (Ой ото оскуолата) кыайыылаахтарынан буоллулар.